,,ორივეს ჩემი ხელით დავახურე საბანი კვირაცხოველზე. ეხლა კიდევ ვზლუქუნებ ისე მენატრებიან“- ერთი სიყვარულის ისტორია

სოც.მედია - 23:29, 16 Jun, 2017

2268

აკა სინჯიკაშვილი ფეისბუქის გვერდზე ერთი სიყვარულის ისტორიას იხსენებს:

,,ამას წინათ ორი ქალი იჯდა კაფეში და ერთი ეუბნება აი ყველაზე ძალიან ვინ გიყვარსო. მეორე არც დაფიქრებულა, ისე უთხრა - კააი რაა სიყვარული არ არსებობს, სუსტების მოგონილიაო და ისეთი მეცნიერული დასკვნა დადო, ლამის გული ამერია )))

ჩემი პაპას ბიძა შალვა, ჯარიდან დაბრუნდა და გიჟივით გაიქცა თავისი ბავშვობის შეყვარებულის, ჩემი ბაბოს დეიდის, ნინას სანახავად. გზაში მიაძახეს შენი ნინა გათხოვდა და დღეს ქორწილი აქვსო. შალვამ არ დაიჯერა სანამ არ დაინახა, რომ სიძე - პატარძალი ბაქანზე იდგნენ და მატარებელს ელოდებოდნენ მაყართან ერთად. შალვამ დანა იძრო და ორივე იქვე დაჩეხა. სიძე მერე გადარჩა, პატარძალი იქვე მოკვდა. გადაეკიდნენ გვარები ერთმანეთს.

როცა პაპაჩემს ჩემი ბაბო შეუყვარდა, ყველა სულიერი მათ წინააღმდეგ დადგა - ცოდვის ქვეშ სიყვარული არა ჩნდებაო.

პაპა რისი სინჯიკაშვილი იყო თავისი არ გაეტანა და ბაბო სახლში წამოიყვანა. ერთმანეთის გარეშე ერთი ღამეც არა სძინებიათ. როცა პაპა წასული იყო, ერთი კვირაც რომ არ ყოფილიყო სახლში, ბაბო თვალს არ დახუჭავდა, ეგრე მეგონა, რომ დამეძინა პაპასა ვღალატობდიო მითხრა ადრე. პაპა მძღოლი იყო და რომ მომკვდარიყო გზაზე არ დაიძინებდა, სანამ სახლში არ მოვიდოდა - დედაკაცი ქუჩაში დგას, მანქანის ხმას ელოდებაო. პაპა როცა გარდაიცვალა, ბაბოს ერთი წუთითაც არ დაუძინია, დღისით უხმოდ იჯდა ეზოში, ყველა ღამით კი პაპას ეძახდა - სადა ხარ ხმა გამეციო, ლანძღავდა და იცინოდა თითქოს ისიც პასუხს უბრუნებდა. ასე გაგრძელდა სულ ცოტა ხნით, სანამ ბაბოც არ მიუწვა ოდნავ ადრე დაძინებულ პაპას. ბაბო ვერ იტანდა როცა ვინმეზე იტყოდნენ მაგარი კაციაო, პაპა კიდევ ვერ იტანდა როცა კაცები ძველ ქალებზე ლაპარაკობდნენ. პაპა 10 წლით უფროსი იყო ბაბოზე და 55 წელიწადი ეძინათ ერთად. ორივეს ჩემი ხელით დავახურე საბანი კვირაცხოველზე. ეხლა კიდევ მენატრებიან, ამხელა ვირი ვზივარ და ვზლუქუნებ ისე მენატრებიან.

დილა მშვიდობისა ვინც გაიღვიძეთ, ამაზე ნაკლები სიყვარული არ გქონოდეთ გულებში არცერთს“- წერს აკა სინჯიკაშვილი.