ევროპარლამენტის რეზოლუცია - ქართველი ექსპერტები მანდატების განაწილების წესის ცვლილებაზე ამახვილებენ ყურადღებას

პოლიტიკა - 12:24, 16 Jun, 2017

856

ვენეციის კომისიის დასკვნას ელოდებიან ქართველი ექსპერტები. ისინი კონსტიტუციური ცვლილებების იმ ნაწილზე ამახვილებენ ყურადღებას, სადაც გაუნაწილებელი მანდატების განაწილების წესზეა საუბარი.

საერთაშორისო გამჭვირვალობა - საქართველოს წარმომადგენელი ლევან ნატროშვილი ამბობს, რომ თუ არსებული ჩანაწერი არ შეიცვლება, ვერ მოხდება სისტემის პროპორციული გარდასახვა და გამარჯვებული პარტიის ლეგიტიმურობა კვლავ ნაკლები იქნება.

„ჩვენ იმედს ვიტოვებთ, რომ უფრო მეტად მიუახლოებენ პროპორციულ გარდასახვას ვიდრე ახლა არის ჩაფიქრებული. ეს თუ ასე არ მოხდება, ისევ დარჩება ის პრობლემა, რაც დღეს არსებობს, როდესაც ლეგიტიმაციის დონე იქნება ყველა ხელისუფლების ყველა გამარჯვებული პარტიისა უფრო ნაკლები, ვიდრე ამას იგი იმსახურებს,“ - განაცხადა ლევან ნატროშვილმა.

სამართლიანი არჩევნებისა და დემოკრატიის საერთაშორისო საზოგადოების წევრი ელენე ნიჟარაძე კი ამბობს, რომ შემოთავაზებული მანდატების განაწილების წესი მნიშვნელოვნად აკნინებს ამ რეფორმის მნიშვნელობას.

"რეალურად ეს გამოიწვევს იმას, რომ შენარჩუნდება ის მდგომარეობა, რაც არსებობს შერეული სისტემის პირობებში, როდესაც სერიოზული დისპროპორცია გვაქვს მიღებულ ხმებსა და მანდატებს შორის,“ - აცხადებს ელენე ნიჟარაძე.

ვენეციის კომისიის დასკვნა და რეკომენდაციები დღეს გახდება ცნობილი. ევროპელი ექსპერტები საქართველოს კონსტიტუციაში შესატან ცვლილებებზე ამ წუთებში მსჯელობენ.