აზერბაიჯანელი ჟურნალისტის საქმე - აფგან მუხთარლის შესახებ ევროპარლამენტმა რეზოლუციას კენჭი უყარა და დაამტკიცა. აღნიშნულს საქართველოს პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილი ეხმაურება. მისი თქმით, ევროპარლამენტის რეზოლუციაში ნათქვამია ის, რასაც ამ საქმესთან მიმართებით საქართველოს ხელისუფლება და პრემიერ-მინისტრიც ამბობენ:

„ამ შემთხვევაში, ევროპარლამენტმა თქვა ის, რასაც ჩვენი ხელისუფლება და პრემიერ-მინისტრი ვამბობთ. ამ საქმესთან დაკავშირებით სრულყოფილი გამოძიება სწრაფად უნდა ჩატარდეს და საერთაშორისო საზოგადოებას ვუთხრათ, რეალურად რა მოხდა. დარწმუნებული ვარ, ჩვენს სამართალდამცავ ორგანოებს ამ ფაქტთან დაკავშირებით არანაირი შემხებლობა არ აქვთ. რაც მოხდა, ცუდია და ჩვენი ქვეყნის ინტერესები დაზიანდა. ჩვენი ღირსების საკითხია, რომ ჭეშმარიტება დადგინდეს და ყველამ გაიგოს, რა მოხდა“, - განაცხადა სესიაშვილმა.