დაპირისპირება მმართველ გუნდში - "თუ მაჟორიტარული სისტემა გაუქმდება ცვლილებას მხარს არ დავუჭერ"

პოლიტიკა - 13:05, 15 Jun, 2017

1398

„ქართულ ოცნებაში“ მაჟორიტარული სისტემის გაუქმებასთან დაკავშირებით აზრთა სხვადასხვაობაა.

მაჟორიტარი დეპუტატი კახა ოქრიაშვილი „ნიუპოსტთან“ აცხადებს, რომ მაჟორიტარული არჩევნების გაუქმება და მთლიანად პროპორციულ სისტემაზე გადასვლა ქვეყანას დააზიანებს ამიტომ ის ცვლილებას მხარს არ დაუჭერს.

„არ ვემხრობი მოსაზრებას, რომ მაჟორიტარული სისტემა, თუნდაც 2024 წელს უნდა გაუქმდეს. ჩემი შეფასებით, საერთოდ არ უნდა მოხდეს გადასვლა პროპორციულ სისტემაზე. სრულად მაჟორიტარული ან შერეული სისტემა მსოფლიოს 130-ზე მეტ ქვეყანაში მოქმედებს, სრულად მაჟორიტარული სისტემაა აშშ-ი, ბრიტანეთში საფრანგეთში და აქედან არაფერი გავითვალისწინოთ?

გამოდის, რომ მარტო საქართველოა ისეთი ქვეყანა, სადაც მაჟორიტარები აზარალებენ ქვეყანას, მე კი პირიქით ვფიქრობ, რომ პროპორციული სისტემა დააზიანებს ქვეყანას, ვერცერთი პარტია ვერ მოიპოვებს 50 % მანდატს ვერ მოიპოვებს, გამარჯვებულ პარტიას 25-30% ექნება, რაც იქნება მყიფე კოალიციური 4 პარტიისგან შემდგარი ხელისუფლებები და როგორც დასავლეთის პრაქტიკა გვაჩვენებს ძალიან ხშირად, პირველივე წინააღმდეგობისას იშლებიან და პოლიტიკურ-ეკონომიკური კრიზისი ყალიბდება. ჩემი მოსაზრებით, შერეული სისტემა დღეს საქართველოსთვის საუკეთესოა და მომავალში თუ სრულად მაჟორიტარულ სისტემაზე გადავალთ, იქნება უკეთესი, ეს საუკეთესო ვარიანტია, რადგან შემთხვევითი ხალხი არ მოხვდება პარლამენტში. ლეგიტიმაცია მაჟორიტარულ სისტემას უფრო აქვს“- აღნიშნა ოქრიაშვილმა.

მისი თქმით, თუ საპარლამენტო არჩევნებთან დაკავშირებით დღეს მოქმედი კონსტიტუცია შეიცვალა, საკონსტიტუციო ცვლილებებს მხარს არ დაუჭერს.

„ამ ნაწილში საკონსტიტუციო ცვლილებებს მხარს არ ვუჭერ, დანარჩენ ნაწილში ვეთანხმები, თუ ერთიანობაში ქინება კონსტიტუცია წარდგენილი, იმ შემთხვევაში ჩემი მხარდაჭერა დოკუმენტს არ ექნება“- დასძინა დეპუტატმა.

ცნობისთვის, საპარლამენტო უმრავლესობის შიგნით უკვე აქტიურად მიმდინარეობს მსჯელობა, რომ მაჟორიტარული სისტემა 2020 წლის ნაცვლად, 2024 წელს გაუქმდეს.