თბილისის ცენტრიდან გატაცებული ბიზნესმენები - ჯიბლაძე იგივე სცენარზე საუბრობს

პოლიტიკა - 12:30, 15 Jun, 2017

2446

10 თვის წინ თბილისის ცენტრიდან სამშენებლო კომპანია კიდ არქიტექტურის დამფუძნებელ ნიკა შავიშვილის გატაცების შესახებ ინფორმაცია აქვს "სვეტის" დამფუძნებელ გია ჯიბლაძესაც. მისი თქმით, სწორედ აღნიშნულ გატაცებას უკავშირდება შავიშვილის "მშენებელი 3"-დან გასვლა.

ბიზნესმენის მიანიშნებს, რომ ლევან ჩქარეული და კობა ბახტაძე, რომლებიც ბრალდებულნი არიან მის გატაცებაში შავიშვილის საქმეშიც ფიგურირებენ.

"რამოდენიმე პირი, ზუსტად იგივე ავტომობილით - ვერცხილისფერი, მერსედესის მიკროავტობუსი მის საქმეშიც ფიგურირებს. ბატონმა ნიკამ ცენტრალურ კრიმინალურ პოლიციასთან ითანამშრომლა და მიმდინარეობს გამოძიება"- აღნიშნა ჯიბლაძემ.

ბიზნესმენი მისი და შავიშვილის გატაცების სცენარზე ამახვილებს ყურადღებას, თუმცა კონკრეტული პირების დასახელებისგან თავს იკავებს.

"ჩემი ვარაუდით, შავიშვილის გასვლა კომპანია მშენებელი სამიდან სწორედ ამ ფაქტს უკავშირდება. შემდეგ იგივე სცენარით მოყვა დაგეგმვა უკვე ჩემი გატაცების - რა სცენარითაც მიმდინარეობდა ბატონი ნიკას გატაცება. ერთ რამეს გეტყვით - პიროვნება, რომელიც მე ტყუილი სახელითა და გვარით გამეცნო და შემდეგ აღმოჩნდა რომ ის სხვაა, ბატონი ნიკაც სხვა სახელით იცნობდა ამ პიროვნებას"- განმარტა გია ჯიბლაძემ.

ცნობისთვის, არსებული ინფორმაციით, "სვეტის" დამფუძნებლის გატაცების საქმეზე ბრალდებულმა პირებმა, 10 თვის წინ, კიდევ ერთი ბიზნესმენი ნიკა შავიშვილიც გაიტაცეს.