ფიქრია ჩიხრაძე ღონისძიებას „ახალგაზრდული დებატები საქართველოში“ დაესწრო

პოლიტიკა - 17:50, 14 Jun, 2017

1038

საქართველოს პრეზიდენტის პოლიტიკური მდივანი ფიქრია ჩიხრაძე დღეს პროექტის "ახალგაზრდული კლუბების ქსელი საქართველოში" ფარგლებში გამართულ ღონისძიებას „ახალგაზრდული დებატები საქართველოში“ დაესწრო.

პროექტი საქართველოს პრეზიდენტის სარეზერვო ფონდის მხარდაჭერით ხორციელდება და სტუდენტებისთვის დებატების სწავლების გზით სხვადასხვა აქტუალურ საკითხებსა და პრობლემებზე საჯარო დისკუსიის არსებობის უზრუნველყოფას ისახავს მიზნად.

დღევანდელი დებატების თემა “კონსტიტუციის განხილვაში საზოგადოების ჩართვა გამართლებულია“ იყო, რომელსაც პრეზიდენტის პოლიტიკური მდივანი საპატიო სტუმრის სტატუსით აკვირდებოდა.

ფიქრია ჩიხრაძემ დებატების დაწყების წინ სიტყვით მიმართა მონაწილე გუნდებს და მათ წარმატება უსურვა.

„ეს კიდევ ერთი პროექტი გახლავთ საქართველოს პრეზიდენტის სარეზერვო ფონდის მხარდაჭერით განხორციელებული საქართველოში, რომელიც ზოგადად კონსტიტუციის პოპულარიზაციას ეხება. კონსტიტუციის ცოდნაში და განხილვაში მაქსიმალურად ფართო საზოგადოების ჩართულობას და განსაკუთრებით მნიშვნელოვანია, რომ ახალგაზრდობა იყოს ამ საკითხებით დაინტერესებული, ჩართული. მით უფრო, რომ დღეს ჩვენს პოლიტიკურ ცხოვრებაში განსაკუთრებით აქტუალურია საკონსტიტუციო საკითხებზე მსჯელობა და დებატები.

ბუნებრივია აღნიშნული პროექტი, რომელიც ახლა ხორციელდება, უკვე ჩატარდა წინასწარი ტრენინგები, საჯარო დებატები გაიმართება საქართველოს რამდენიმე უნივერსიტეტში. ვფიქრობ სერიოზულად შეუწყობს ხელს იმას, რომ ჩვენი ცნობიერება კონსტიტუციასთან მიმართებაში კიდევ უფრო გაიზარდოს“,-აღნიშნა ფიქრია ჩიხრაძემ.

ახალგაზრდული დებატები 16 ივნისს ბათუმში, ბათუმის შოთა-რუსთაველის სახელობის უნივერსიტეტში, 20 ივნისს კი ახალციხეში, სამცხე-ჯავახეთის სახელმწიფო უნივერსიტეტში გაიმართება.