ევროპარლამენტი საქართველოს აფგან მუხთარლის საქმის დროული და ეფექტიანი გამოძიებისკენ მოუწოდებს

პოლიტიკა - 14:16, 14 Jun, 2017

1736

ევროპარლამენტი აზერბაიჯანელი ჟურნალისტის აფგან მუხთარლის გატაცების ფაქტს ეხმაურება და ამასთან დაკავშირებით 15 ივნისს რეზოლუციის მიღებასაც აპირებს. რეზოლუციის პროექტში ნათქვამია, რომ ევროპარლამენტი საქართველოდან აზერბაიჯანელი ჟურნალისტის, აფგან მუხთარლის გატაცების ფაქტს მკაცრად გმობს და ბაქოში მის დაკავებასა და მოსალოდნელ გასამართლებას ადამიანის უფლებების უხეშ დარღვევად მიიჩნევს.

რეზოლუციის პროექტში მუხთარლის საქმეზეა საუბარი და მოყვანილია დაკავების და აზერბაიჯანში გადაყვანის ის დეტალები, რომელიც მუხთარლიმ ადვოკატის მეშვეობით გაავრცელა. რეზოლუციის პროექტში არის მოწოდება საქართველოს მიმართ, რომ საქართველო, როგორც ადამიანის უფლებების ევროპული კონვენციის წევრი ქვეყანა, პასუხისმგებელი და ვალდებულია, მის ტეროტორიაზე მცხოვრები აზერბაიჯანის მოქალაქეებისთვის შექმნას გარანტია იმისა, რომ არ მოხდეს მათი იძულებით დაბრუნება აზერბაიჯანში. ამასთანავე აქცენტია გაკეთებული იმაზეც, რომ გაზრდილია რიცხვი შემთხვევების, როდესაც საქართველოში მცხოვრებ აზერბაიჯანელებს ქვეყანაში ცხოვრებისთვის აუცილებელი საბუთის ვადის გაგრძელებაზე უარს ეუბნებიან. მოყვანილია პრეზიდენტის განცხადებაც, სადაც გიორგი მარგველაშვილი მუხთარლის საქმეს საქართველოს სახელმწიფოსა და სუვერენიტეტის წინაშე არსებულ დიდ გამოწვევად აფასებს.

ევროპარლამენტი საქართველოს ხელისუფლებას დროული, გამჭვირვალე და ეფექტიანი გამოძიებისკენ და დანაშაულის ჩამდენი პირების პასუხისმგებლობისკენ მოუწოდებს, ამასთანავე შეახსენებს, რომ სწორედ ხელისუფლებაა პასუხისმგებელი, რომ დაიცვას საქართველოს ტერიტორიაზე მცხოვრები მესამე ქვეყნის მოქალაქეები, ასევე პირები, რომლებიც პოლიტიკურ თავშესაფარს ითხოვენ და, რომლებსაც საკუთარ ქვეყანაში პოლიტიკური ან სხვა საქმიანობის გამო გასამართლება ელოდებათ.

რეზოლუციაში არის მოწოდება აზერბაიჯანის ხელისუფლების მიმართაც, რომ უპირობოდ მოხდეს დაკავებული ჟურნალისტის აფგან მუხთარლის გათავისუფლება.