ესტაკადის მშენებლობასთან დაკავშირებით დღეს თბილისის მერმა დავით ნარმანიამ კიდევ ერთი კომენტარი გააკეთა. საუბარია ე.წ. ახალ გზაზე გზის გაყვანაზე, რომელზეც პასუხისმგებლობა კომპანია „ზიმოს“ აქვს აღებული და რომლისთვისაც მერიას ერთი მილიონი ლარი უკვე გადარიცხული აქვს.

როგორც ცნობილია, აღნიშნული ტერიტორია ბიძინა ივანიშვილს აქვს ნაყიდი ვალდებულებით, რომ თუ გზის მშენებლობა დაიწყებოდა, თბილისისთვის უნდა დაებრუნებინა იგი, თუმცა, მიზეზად იმისა, რომ ესტაკადის მშენებლობა არ იწყება და ხელშეკრულების პირობები დაირღვა, სახელდება ის, რომ ივანიშვილი დედაქალაქს ტერიტორიას არ უბრუნებს.

სხვა ვერსია აქვს თბილისის მერს, მისი განცხადებით, მან პირადად მიიღო გადაწყვეტილება, არ დაწყებულიყო მშენებლობა, რადგან აღნიშნულისთვის 80-მდე ხის გადანერგვა იყო საჭირო, რაც მათ გახმობას გამოიწვევდა. თუმცა, გუშინდელი განცხადებიდან განსხვავებით, სადაც ნარმანიამ ტქვა, რომ მშენებლობა აღარ დაიწყებოდა, დღეს აღნიშნა, რომ იმ შემთხვევაში თუ მშენებლობის დაწყება არ მოხდება, მერია „ზიმოს“ გადარიცხული მილიონის დაბრუნებას მოსთხოვს.

აღნიშნულს „ერთიანი ნაციონალური მოძრაობის“ რიგებში განცხადებით ეხმაურებიან:

„დავით ნარმანია არის თავის მართლების რეჟიმში, მას ან უნდა დაედასტურებინა, რომ აღნიშნული ესტაკადის განხორციელება შეჩერებულია მხოლოდ იმის გამო, რომ ბიძინა ივანიშვილს ვერ მოთხოვა ვალდებულებების შესრულება, რომლითაც ის ვალდებულია, რომ მოთხოვნისთანავე დაეთმო თბილისელებისთვის იმ მიწის ნაკვეთი, რომელზეც ესტაკადას უნდა გაევლო და უფრო მეტიც, ბიძინა ივანიშვილს უნდა დაეხარჯა 500 ათასი ლარი ან დავით ნარმანიას უნდა ეთქვა ტყუილები, თითქოს იქ ხეები იჭრებოდა, თითქოს იყო სხვა სახის პრობლემები და თავზე ნაცარი დაეყარა.

თუ არ მოსწონდა ეს პროექტი, მაშინ რატომ ჩაურიცხა თბილისის მერიამ კონტრაქტორ კომპანია შპს ზიმოს ერთი მილიონი ლარი ავანსის სახით, რომელსაც წელიწადზე მეტია ამ კომპანია თავის პირადი მიზნებისთვის იყენებს. მათ შორის, შესაძლოა, იყენებდეს ბიძინა ივანიშვილის ხეების გადარგვა-გადმორგვისთვის,“ - განაცხადა ირაკლი ნადირაძემ.