სტრატეგიულ მოკავშირეებთან ერთად გლობალური უსაფრთხოების უზრუნველყოფაში კონტრიბუციას საქართველო მომავალშიც მტკიცედ გააგრძელებს - ეს განცხადება საქართველოს თავდაცვის მინისტრმა ლევან იზორიამ გერმანიის ფედერაციულ რესპუბლიკაში ოფიციალური ვიზიტის დროს განაცხადა. თავდაცვის უწყების ხელმძღვანელი მაგდერბურგში, საბრძოლო მომზადების ცენტრში ქართული ქვედანაყოფის ავღანეთში გადასროლისწინა წვრთნას დაესწრო და გერმანელი გენერლებისგან ქართველი სამხედროების მომზადების დონის შესახებ მაღალი შეფასება მიიღო.

მაგდერბურგის საბრძოლო მომზადების ცენტრში ლევან იზორიას ხელმძღვანელობით ქართულ დელეგაციას საწვრთნელი ცენტრის ხელმძღვანელმა, პოლკოვნიკმა უვე ბეკერმა უმასპინძლა. მან თავდაცვის მინისტრს საბრძოლო მომზადების ცენტრის შესაძლებლობების შესახებ პრეზენტაცია წარუდგინა.

ლევან იზორია სამდღიანი ოფიციალური ვიზიტით გერმანიის ფედერაციულ რესპუბლიკაში იმყოფება. ვიზიტის ფარგლებში თავდაცვის მინისტრი გერმანელ კოლეგას ურსულა ფონ დერ ლაინს, ასევე ბერლინის უსაფრთხოების აკადემიის პრეზიდენტს, დოქტორ კარლ-ჰეინც კამპს და უსაფრთხოებისა და საგარეო საქმეთა საკითხებში ბუნდესკანცლერის მრჩეველს კრისტოფერ ჰოიზგენს შეხვდება.