,,...როგორ მოსთხოვა დეკანოზმა შალვამ აღსარების დროს გარკვეული ინფორმაცია“

,,...როგორ მოსთხოვა დეკანოზმა შალვამ აღსარების დროს გარკვეული ინფორმაცია“ - დეკანოზს თეოლოგი პასუხობს

სოც.მედია - 18:23, 13 Jun, 2017

24579

თეოლოგი, სემინარია-აკადემიის კურსდამთავრებული ზვიად ცაბაძე დეკანოზ შალვა კეკელიას ბრალდებებს პასუხობს, რომლის შესახებაც დეკანოზმა ტვ ,,ობიექტივის“ ეთერში ისაუბრა და სადაც დეკანოზი აცხადებდა, რომ ჭყონდიდის მღვდელმსახური მამა ანდია სარია და სასულიერო სასწავლებლის სტუდენტები მას აღსარების საიდუმლოს გაცემას აბრალებდნენ. ზვიად ცაბაძე დეკანოზის პასუხად 2012 წელს მომხდარ ფაქტს იხსენებს და ამბობს, რომ დეკანოზმა შალვა კეკელიამ ერთი ერტი სტუდენტისგან აღსარების დროს გარკვეული ინფორმაციის მიღება მოითხოვა.

,,პასუხი დეკანოზ შალვა კეკელიას ცილისმწამებლურ განცხადებაზე

2017 10 ივნისს დეკანოზმა შალვა კეკელიამ ტელეკომპანია ''ობიექტივის'' პირდაპირ ეთერში (იხ. ლინკი) ისაუბრა მღვდელ-მონოზონ ანდრიასთან (სარია) და სხვა სტუდენტებთან დაკავშირებით და განაცხადა, რომ, თითქოს მან (მღვდელ-მონოზონმა) და სასულიერო სასწავლებლის სხვა სტუდენტებმა აღსარების გაცემა დააბრალეს. ამ ცილისმწამებლურ და აბსურდულ ბრალდებასთან (გამოითქვა სხვა არარსებული ბრალდებებიც) დაკავშირებით, გვსურს განვაცხადოთ შემდეგი:

საქმე ეხება 2012 წელს, თბილისის სასულიერო აკადემიასა და სემინარიაში განვითარებულ მოვლენებს, რომლის შესახებაც საზოგადოებამ თითქმის არაფერი იცის, რადგან ეს საჯაროდ არსად განხილულა. ამ მოვლენების დროს მართლაც გაიჟღერა აღსარების თემამ, თუმცა სრულიად სხვა კონტექსტში და არა იმ სახით, რომელსც დეკანოზი შალვა საზოგადოებას სთავაზობს და ამით ის მიზანმიმართულად შეცდომაში შეჰყავს. პანსიონში მცხოვრები ერთ-ერთი სტუდენტისგან (ამ ეტაპზე მის ვინაობას არ ვასახელებთ) შევიტყვეთ, თუ როგორ მოსთხოვა აღსარების დროს მას დეკანოზმა შალვამ გარკვეული სახის ინფორმაცია ( ხომ არავინ აპირებდა რექტორის წინააღმდეგ ჩივილს, გამოსვლას, პროტესტს, ბუნტს და ა..შ.) მიეწოდებინა. ეს ყველაფერი წმინდა ოლარის ქვეშ!!! ამ მონათხრობის მოწმეა მრავალი სტუდენტი და ჩვენ მზად ვართ, მედიის დაინტერესების შემთხვევაში, სრული და ამომწურავი ინფორმაცია მივაწოდოთ საზოგადოებას და აღვკვეთოთ დეკანოზ შალვა კეკელიას მიზანმიმართული მცდელობა, მოახდინოს ჩვენი და იმ უამრავი სტუდენტის მარგინალიზაცია, რომლებიც 2012 წლის ამბებში აქტიურად მონაწილეობდნენ” - წერს ზვიად ცაბაძე.