ჩვენ მაქსიმუმს ვაკეთებთ, რათა გაიზარდოს წნეხი რუსეთისადმი და მათი აგრესიისადმი

ჩვენ მაქსიმუმს ვაკეთებთ, რათა გაიზარდოს წნეხი რუსეთისადმი და მათი აგრესიისადმი - ჯანელიძე

პოლიტიკა - 16:03, 13 Jun, 2017

1275

საგარეო საქმეთა მინისტრი მიხეილ ჯანელიძე არ ადასტურებს ინფორმაციას, რომ საქართველოს ხელისუფლება რუსეთის აგრესიას მწვავე პასუხებით არ პასუხობს.

ოპოზიციის ბრალდებას მინისტრმა უპასუხა და თქვა, რომ საქართველოს ხელისუფლება მაქსიმალურად ახდენს საქართველოს თემის წამოწევას საერთაშორისო ფორმატებში.

”მე უნდა ვისაუბრო იმაზე, რომ როდესაც ფართომასშტაბიანი პასუხი იყო გასაცემი რუსეთისთვის, ამ პასუხის გაცემა ვერ მოხდა და ვერ მოხდა მობილიზება საერთაშორისო საზოგადოების. დღეს ჩვენ რასაც ვაკეთებთ არის ის, რომ ეტაპობრივად ვზრდით საერთაშორისო საზოგადოების ჩართულობას ამ პროცესში. ყველა ის გადაწყვეტილება, კონტაქტი, რეზოლუცია, ვიზიტი, ჩვენი ურთიერთობა ჩვენს პარტნიორებთან უკავშირდება იმას, რომ ჩვენი პარტნიორების და საერთაშორისო საზოგადოების პოზიცია იყოს კონსოლიდირებული. დამეთანხმებით, რომ მზარდი მხარდაჭერაა - იქნება ეს რეზოლუციები თუ გადაწყვეტილებები და ამასთანავე ეფექტური და მკაცრი რეაგირება ისეთი მნიშვნელოვანი მოთამაშისგან, როგორც არის აშშ და ეს არის კრიტიკულად მნიშვნელოვანი ამ მწვავე და ეფექტური კონტრზომების მისაღებად რუსეთის აგრესიის საპასუხოდ.

ჩვენ ვხედავთ, რომ რუსეთის პოლიტიკა დაფუძნებულია აგრესიაზე, ძალაზე და ეს არამარტო საქართველოსთან მიმართებაში, არამედ ბევრ სხვა ქვეყანასთან მიმართებაში ჩანს. ამ გამოწვევების დროს, ჩვენ ვახდენთ მაქსიმალურად ჩვენი თემის წამოწევას და ამას ვაკეთებთ კონკრეტული შედეგებით ყველა ფორმატში, სადაც ეს უნდა მოხდეს. ჩვენ ვაკეთებთ მაქსიმუმს, რათა გაიზარდოს წნეხი რუსეთის ფედერაციისადმი და მათი აგრესიისადმი. ჩვენი მიზანი არის, რომ მოხდეს დეოკუპაცია, დაბრუნდნენ ლტოლვილები და შესაძლებელი გახდეს ამ კონფლიქტის პოლიტიკური დარეგულირება”, - განაცხადა ჯანელიძემ.