"ინტერრაოს" სარჩელი - ენერგეტიკის მინისტრის მოადგილე ორ მხარეს შორის არსებულ უთანხმოების დეტალებზე საუბრობს

პოლიტიკა - 15:40, 12 Jun, 2017

1387

„ინტერრაომ“ საქართველოს წინააღმდეგ სტოკჰოლმში საერთაშორისო საარბიტრაჟო პროცედურები დაიწყო. რუსული კომპანია ელექტროენერგიის ტარიფის გაზრდასა და ვალუტის დევალვაციის გამო, კომპენსაციას ითხოვს და ათეულობით მილიონი დოლარის ზარალზე საუბრობს.

„თელასის ნაწილში ითხოვს გარკვეული კომპენსაციების მიღებას ან ტარიფში ამის ასახვას, ეს ორი ფორმატია. ბუნებრივია ჩვენ არ ვეთანხმებით ამ პოზიციებს, რომ დავთანხმებოდით შესაძლოა შეთანხმებაც მომხდარიყო, კომპანიამ გადაწყვიტა და მას აქვს ამ ხელშეკრულებებით უფლება საარბიტრაჟო დავის წამოწყების. ჩვენც მოვემზადებით შესაბამისად, იუსტიციის სამინისტრო ამ შემთხვევაში არის საქართველოს წარმომადგენელი, დაიწყება მომზადება და დეტალურად გარკვევა" - აღნიშნავს საქაერთველოს ენერგეტიკის მინისტრის მოადგილე მარიამ ვალიშვილი.

საქართველოს ენერგეტიკის და წყალმომარაგების მარეგულირებელი ეროვნული კომისია ეხმაურება. გოჩა შონიამ აღნიშნა, რომ კომისია ტარიფებს შესაბამისი მეთოდოლოგიების მიხედვით არეგულირებს.

„კომისიის ცალსახა და ხისტი პოზიცია არის, რომ ტარიფები უნდა რეგულირდებოდეს მეთოდოლოგიის საფუძველზე, რომელიც უნდა იყოს შესაბამისი საუკეთესო პრაქტიკასთან. კომისია ვალდებულია შეასრულოს სასამართლოს გადაწყვეტილებები. თუ იქნება სასამართლოს საბოლოო გადაწყვეტილება ტარიფების გადახედვასთან დაკავშირებით, რა თქმა უნდა, კომისია ამ გადაწყვეტილებას შეასრულებს,“ - განაცხადა გოჩა შონიამ.