,,საჭიროა განსხვავებული ტიპის საპოლიციო რეფორმა, რომელიც შეიცავს სანდოობის და ავტორიტეტის ზრდის საშუალებებს“

პოლიტიკა - 20:54, 11 Jun, 2017

4632

პარტია ,,რეფორმატორების’’ პოლიტიკური საბჭოს წევრი ნიკა კირვალიძე განსხვავებული ტიპის საპოლიციო რეფორმის საჭიროებაზე საუბრობს. მისი შეფასებით, აქამდე არსებული რეფორმა არასრულყოფილია, ვინაიდან დღემდე ვერ მოხერხდა პოლიციის მხრიდან კანონგარეშე მოქმედებების აღკვეთა, რაც პოლიციის მიმართ საზოგადოების უნდობლობას იწვევს.

,,პოლიციის სისტემაში აქამდე გატარებული რეფორმები ცალსახად არასრულყოფილი და ნაკლებად ეფექტურია, ვინაიდან დღესაც აქტუალურია მოსახლეობას და ამ ინსტიტუტს შორის ,,ჩატეხილი ხიდის’’ არსებობა. სავსებით ლოგიკურია ამ მოცემულობის აქტუალურობა, ვინაიდან დღემდე გვიწევს პროტესტის დაფიქსირება იმ უკანონო მოქმედებების წინააღმდეგ, რომელსაც ადგილი აქვს ჩვენს სამართალდამცავ ორგანოებში. გრძელდება იარაღის და ნარკოტიკის ჩადება და სხვა კანონგარეშე მოქმედებები.

სრულყოფილი და სიღრმისეულ ანალიზზე დაფუძნებული რეფორმა იძლევა ეფექტურობის და სანდოობის ზრდის შესაძლებლობებს, თითოეულმა სამართალდამცავმა უნდა გააცნობიეროს, რომ პოლიციელის მუნდირი ავტომატურად არ ნიშნავს ღირსებას, იგი ჩვეულებრივი სამოსია იქამდე, ვიდრე თავად პოლიციელები არ იზრუნებენ მისი ავტორიტეტისთვის.

საზოგადოება არ არის ბრმა, ვაცნობიერებთ პოლიციის უდიდეს მნიშვნელობას, თუმცა ვხედავთ და ვგმობთ მანკიერებას, ტრადიციულად არსებულ სისტემურ პრობლემებს, რომელიც სწორედ საზოგადოებრივი და პოლიტიკური რეაგირების გარეშე ტრანსფორმირდება, როგორც რეჟიმი.

ვფიქრობ, საჭიროა განსხვავებული ტიპის საპოლიციო რეფორმა, რომელიც გადაიარაღების და აღჭურვის ელემენტების გარდა შეიცავს სანდოობის და ავტორიტეტის ზრდის საშუალებებს.

პარტია ,,რეფორმატორებში’’ ვმსჯელობთ პოლიციის რეფორმირების მიმართულებით და მიგვაჩნია, რომ უნდა დავნერგოთ დასავლური ტიპის საპოლიციო მოდელი, სადაც მუნიციპალიტეტების დონეზე მოსახლეობა თავად ირჩევს პოლიციის მაღალჩინოსნებს. ამ გზით შევძლებთ ხალხს და პოლიციას შორის ,,ჩატეხილი ხიდის’’ აღდგენას, სწორედ ამ ტიპის რეფორმის მთავარი პოზიტიური მხარე მოსახლეობისადმი პოლიციის ანგარიშვალდებულების გაზრდაა. საპოლიციო ძალებზე დემოკრატიული კონტროლის ხალხისთვის გადაცემა მოგვცემს მეტ სანდოობას და ამ უმნიშვნელოვანესი ინსტიტუტის მაქსიმალურად დეპოლიტიზირებას’’ - ნათქვამია კირვალიძის განცხადებაში.