„ქართულ-აზერბაიჯანული სპეცსამსახურების წარმატებული ღონისძიება“-აზერბაიჯანელი დეპუტატი მუხთარლის დაკავებაზე

პოლიტიკა - 18:19, 09 Jun, 2017

4912

აზერბაიჯანელი დეპუტატის ელმან ნასიროვის თქმით, აფგან მუხთარლის დაკავება აზერბაიჯანულ-ქართული სპეცსამსახურების ერთობლივი შედეგი იყო. ამის შესახებ ნასიროვმა რადიო თავისუფლებისთვის მიცემულ ინტერვიუში ისაუბრა. აზერბაიჯანელი დეპუტატის თქმით, აფგან მუხთარლი მსხვილი ქსელის ნაწილია და მის დაკავებას ნასიროვი წარმატებულ ღონისძიებად აფასებს:

„აფგან მუხთარლი არის მსხვილი ქსელის განუყოფელი ნაწილი, ეს სიტუაციის ანალიზმა გვიჩვენა. ისეთებს, როგორიც აფგან მუხთარლია ძლიერი პოლიტიკური ძალები საქართველოში აგროვებენ. საუბარია დიდ ფინანსებსა და მსხვილ ორგანიზაციებზე. საქმე რომ მხოლოდ მას შეხებოდა, მისი დაკავების აუცილებლობა არ დადგებოდა. სწორედ ეს ქსელი იცავს მუხთარლის და მისი აზერბაიჯანში ჩამოყვანას წინააღმდეგობას უწევდნენ. ეს იყო აზერბაიჯანისა და საქართველოს სპეცსამსახურების ერთობლივი მუშაობის შედეგი, აზერბაიჯანულმა სტრუქტურებმა პროფესიონალიზმი აჩვენეს და დამნაშავე ადამიანი აზერბაიჯანში ჩამოიყვანეს. ეს ღონისძიება, შეიძლება შეფასდეს, როგორც ერთ-ერთი ყველაზე წარმატებული.“- განაცხადა დეპუტატმა.

შეგახსენებთ 29 მაისს საღამოს თბილისში აზერბაიჯანელი აქტივისტი და ჟურნალისტი აფგან მუხთარლი გაუჩინარდა. მისი ადვოკატის მიერ გავრცელებული ინფორმაციით ის თბილისში, საკუთარ სახლთან დააკავეს და ძალით ჩასვეს მანქანაში. დამკავებლებს თავი არ წარუდგენიათ, თუმცა, მუხთარლის აზრით, ისინი საქართველოს სპეცსამსახურების თანამშრომლები იყვნენ. როგორც აფგან მუხთარლის ადვოკატი აცხადებს, მისი დაცვის ქვეშ მყოფ პირს ტომარა ჩამოაცვეს თავზე და დაახლოებით ორი საათის განმავლობაში მიჰყავდათ მანქანით გაურკვეველი მიმართულებით. მანქანა ორჯერ გამოიცვალეს. მუხთარლის თქმით, მესამე მანქანაში აზერბაიჯანულად ლაპარაკობდნენ. აზერბაიჯანელი ჟურნალისტის სიტყვებით, როცა მას ტომარა მოხსნეს, იგი აზერბაიჯანის სასაზღვრო-გამშვებ პუნქტში იმყოფებოდა. მუხთარლის თქმით, მას 10 ათასი ევრო ჩაუდეს. აზერბაიჯანის ხელისუფლება საზღვრის უკანონოდ გადაკვეთისა და კონტრაბანდის ბრალდებებს უყენებს. აფგან მუხთარლი და მისი მეუღლე, ჟურნალისტი ლეილა მუსტაფაევა, მათი განმარტებით, ჟურნალისტური საქმიანობისა და კრიტიკული პოზიციების გამო, აზერბაიჯანის ხელისუფლების მხრიდან სისტემურ დევნასა და შევიწროებას განიცდნენ.

საქართველოს სახელმწიფო სტრუქტურები ამ დრომდე უარყოფენ აღნიშნულ ღონისძიებაში ქართული მხარის მონაწილეობას.