,,ბატონი თომას მარკერტი მიდასტურებს მეილით, რომ დასკვნა გაეგზავნა პარლამენტის თავმჯდომარეს, ასევე საქართველოს პრეზიდენტსაც“

პოლიტიკა - 16:52, 09 Jun, 2017

2344

პარლამენტის თავმჯდომარის პირველი მოადგილის თამარ ჩუგოშივილის თქმით, ვენეციის კომისიიდან წინასწარი დასკვნის დოკუმენტი გაეგზავნა, როგორც პარლამენტის თავმჯდომარეს, ასევე პრეზიდენტსაც. აღნიშნული განცხადება ჩუგოშვილმა იმ დისკუსიის საპასუხოდ გააკეთა, რომელიც პარლამენტის თავმჯდომარესა და პრეზიდენტის ადმინისტრაციას შორის გაიმართა. პარლამენტის თავმჯდომარემ პრეზიდენტის ადმინისტრაცია ვენეციის კომისიის დასკვნის მედიაში გასაჯაროებაში დაადანაშაულა, პრეზიდენტის საპარლამენტო მდივნსი ანა დოლიძის განცხადებით, კი ვენეციის კომისიის წინასწარი დასკვნა პრეზიდენტს მიღებული არ აქვს:

„ძალიან არ მინდოდა ამ დისკუსიაში შეყოლა, იმიტომ რომ ზოგადად არ მომწონს ის ტენდენცია, რაც ჩვენსა და პრეზიდენტის ადმინისტრაციის ურთიერთობაში ყალიბდება. ჩვენ იმ პირობას ვასრულებდით, რა პირობაც ვენეციის კომისიისთვის გვქონდა მიცემული. ვინაიდან პრეზიდენტის ადმინისტრაციის წარმომადგენელმა ანა დოლიძემ განაცხადა, რომ არ აქვს პრეზიდენტის ადმინისტრაციას ინფორმაცია მიღებული, უბრალოდ თავს ვალდებულად ვთვლი, რომ მეც ის ინფორმაცია გავაჟღერო, რაც მაქვს. ვინაიდან მე ვარ საკონტაქტო პირი ვენეციის კომისიისთვის საკონსტიტუციო კომისიიდან. მე მაქვს ის მეილი, სადაც მიდასტურებს ბატონი თომას მარკერტი, რომ როგორც კი გამოეგზავნა დასკვნა საქართველოს პარლამენტის თავმჯდომარეს, ასევე გაეგზავნა საქართველოს პრეზიდენტსაც. თუ ვინმეს აინტერესებს, ტელეფონში მეილი მაქვს და შემიძლია ნებისმიერ დაინტერესებულ ადამიანს გავუზიარო“, - განაცხადა თამარ ჩუგოშვილმა.