დაგროვებითი ბარათის ,,მოითხოვე ქართული“ ერთგული მომხმარებლები დაჯილდოვდნენ

პოლიტიკა - 14:30, 09 Jun, 2017

1147

საქართველოს პრეზიდენტის ეკონომიკურმა მრჩეველმა მაია მელიქიძემ დღეს ქართული პროდუქციის პირველი დაგროვებითი ბარათის ,,მოითხოვე ქართული“ ერთგული მომხმარებელი დააჯილდოვა.

დაგროვებითი ბარათი პრეზიდენტის ინიციატივით, საპრეზიდენტო კამპანიის ,,მოითხოვე ქართული“ ფარგლებში პრეზიდენტის სარეზერვო ფონდის დაფინანსებით შეიქმნა და ქართული პროდუქციის პოპულარიზაციისა და გაყიდვების წახალისებას ისახავს მიზნად.

დაგროვებით ბარათზე დაგროვებული „ქართულების“ მიხედვით დღეს 10 გამარჯვებულს „ქართული პროდუქციის ერთგული მომხმარებლის“ სერტიფიკატი საქართველოს პრეზიდენტის ხელმოწერით პრეზიდენტის მრჩეველმა მაია მელიქიძემ და თბილისის მერის მოადგილე ირაკლი ლექვინაძემ გადასცეს. გამარჯვებულებს გადაეცათ ასევე სპეციალური პრიზები 45-ზე მეტი ქართული კომპანიისგან.

როგორც მაია მელიქიძემ დაჯილდოების ცერემონიაზე განაცხადა, პრეზიდენტის აღნიშნული ინიციატივის მიზანი ეროვნული ვალუტის გაძლიერება, ქართული წარმოების გაზრდა და უმუშევრობის შემცირებაა.

გამარჯვებულებს მაია მელიქიძემ საქართველოს პრეზიდენტის სახელით პროექტში ჩართვისა და მონაწილეობისათვის მადლობა გადაუხადა და საქართველოს მოსახლეობას კი, აქტიურობისაკენ მოუწოდა.

ამ ეტაპზე დამზადებულია 20 ათასი დაგროვებითი ბარათი, რომელიც ჯერ მხოლოდ 2 თვეა მოქმედებს და ქართულ პროდუქციის გაყიდვები თითქმის 6 პროცენტით გაიზარდა.

პროექტში უკვე ქართველი დიზაინერები და ხელოვანები ჩაერთვნენ. დღესვე დაგროვებითი ბარათი ქართული დიასპორის წარმომადგენლებს გადაეცათ, რომლებიც დაჯილდოების ცერემონიას ესწრებოდნენ.

დაგროვებითი ბარათის პროექტს ააიპ "მოითხოვე ქართული" ახორციელებს. მომხმარებელთა წახალისებისთვის ბარათზე დაგროვებული ქართულების მიხედვით ყოველთვიური კონკურსი ტარდება თვის ყველაზე მეტი "ქართულების" მფლობელი ტოპ ათეულის გამოსავლენად.

დაჯილდოების ცერემონიას ესწრებოდნენ საქართველოს პრეზიდენტის ადმინისტრაციის, ქ. თბილისის მუნიციპალიტეტის მერიის, სამთავრობო და არასამთავრობო სექტორის, დიასპორული ინვესტიციების მხარდამჭერი ასოციაციის, ხელოვნების სხვადასხვა დარგის წარმომადგენლები, პროექტის პარტნიორი კომპანიები.