საკონსტიტუციო ცვლილებების პრობლემა და მედიისადმი დამოკიდებულება ჩვენ შეშფოთებას იწვევს- ევროპარლამენტარი

პოლიტიკა - 10:28, 09 Jun, 2017

1303

ევროპის სახალხო პარტიის ვიცე-პრეზიდენტი, ევროპარლამენტარი პაოლო რანჟელი საქართველოში საკონსტიტუციო ცვლილებების პროცესს და ამასთან დაკავშირებით ვენეციის კომისიის შეფასებას ეხმაურება. მისი თქმით ქართულმა მხარემ კომისიის რეკომენდაციები აუცილებლად უნდა გაითვალისწინოს. როგორც ევროპარლამენტარი „რუსთავი2“-თან საუბარში აცხადებს, შეშფოთებას იწვევს მანდატების განაწილების პრინციპი, ასევე კითხვის ნიშნებია პრეზიდენტის არჩევის წესის ცვლილებასთან დაკავშირებითაც.

„საკონსტიტუციო რეფორმის არსებული პროექტის განხორციელება საქართველოსა და ევროკავშირს შორის დისტანციას გაზრდის. განსაკუთრებით ეს საარჩევნო სისტემის ცვლილებას და პრეზიდენტს არჩევის წესის შეცვლაც ეხება. ქართულმა მხარემ საჯაროდ დადო პირობა, რომ ვენეციის კომისიის რჩევებს გაიზიარებს.“- განაცხადა პაოლო რანჟელიმ.

სახალხო პარტიის წარმომადგენლის თქმით ევროპარლამენტარები ყურადღებით აკვირდებიან ტელეკომპანია რ2-თან დაკავშირებით განვითარებულ მოვლენებსაც. მისი განცხადებით ადამიანის უფლებები, კანონის უზენაესობა, სასამართლოსა და მედიის დამოუკიდებლობა დაცული უნდა იყოს:

"ჩვენ ყურადღებით ვაკვირდებით რუსთავი2-ის საქმესაც. საქართველოს მთავრობის მიერ განხორციელებულ რეფორმებს მიველსალმებით, თუმცა ახლა დღის წესრიგში საკონსტიტუციო ცვლილებების პრობლემა და თავისუფალი მედიის მიმართ დამოკიდებულება დადგა. ეს ის საკითხებია, რომელიც ჩვენს შეშფოთებას იწვევს. მხოლოდ ეკონომიკური რეფორმები არაა საკმარისი. ადამიანის უფლებები, კანონის უზენაესობა, სასამართლოსა და მედიის დამოუკიდებლობა დაცული უნდა იყოს.“- განაცხადა რანჟელიმ.