"მძიმე შემთხვევაა, უშიშროების საბჭოს მდივანს წარმოდგენა არ აქვს, სად არის და რა არის მისი სტატუსი"- კობახიძე

პოლიტიკა - 16:50, 08 Jun, 2017

1275

პარლამენტის თავმჯდომარე უშიშროების მდივანს აკრიტიკებს. ირაკლი კობახიძის თქმით, დავით რაქვიაშვილი თავის ფუნქციებში ვერ ერკვევა და ის მას უშიშროების საბჭოს სახელით ელაპარაკება, მაშინ როდესაც ამ საბჭოს წევრი თავად პარლამენტის თავმჯდომარეცაა.

როგორც კობახიძე აცხადებს არ შეიძლება უშიშროების საბჭოს მდივანი იმაზე საუბრობდეს, რომ საკონსტიტუციო ცვლილებები ნატოში ინტეგრაციის გზაზე დაბრკოლებებს ქმნის.

"უშიშროების საბჭოს მდივანი, ანუ ის პირი, რომელიც მემსახურება მე, ისევე როგორც პრეზიდენტს, პრემიერს და საბჭოს სხვა წევრებს და მეუბნება, რომ მე და თქვენ ვერ შევთანხმდებით, ეს ნიშნავს იმას, რომ უშიშროების საბჭოს მდივანს საერთოდ წარმოდგენა არ აქვს, სად არის და როგორ არის. უშიშროების საბჭოს მდივანმა არ იცის, რა არის მისი სტატუსი ეს არის ძალიან მძიმე შემთხვევა. მას ჰგონია, რომ ის წარმოადგენს უშიშროების საბჭოს. ასეთ დონეზეც კი არ იცის, რა ხდება საქართველოში, საქართველოს კონსტიტუციაში. მე წარმოვადგენ უშიშროების საბჭოს, მე ვარ უშიშროების საბჭოს წევრი, ისევე როგორც პრეზიდენტი, პრემიერი, თავდაცვის კომიტეტის თავმჯდომარე და ასე შემდეგ. მე ვარ უშიშროების საბჭო და როცა უშიშროების საბჭოს სახელით, უშიშროების საბჭოს წევრს, მდივანი მელაპარაკება, გამოდის, რომ მას საერთოდ არა აქვს წარმოდგენა საქართველოს კონსტიტუციაზე. რაც შეეხება პარლამენტის წევრს და პარლამენტის თავმჯდომარეს, ის არის სახელმწიფო პოლიტიკური თანამდებობის პირი. ეს არის ორჯერ ორი ოთხი. არ შეიძლება საჯარო მოსამსახურე ესაუბრებოდეს სახელმწიფო პოლიტიკური თანამდებობის პირს და ეუბნებოდეს, რომ “მე და შენ ვერ შევთანხმდებით“. როცა უშუშროების საბჭოს მდივანმა ასეთი რამე არ იცის, რბილად რომ ვთქვა, შემაშფოთებელია“- განაცხადა ირაკლი კობახიძემ.

პარლამენტის თავმჯდომარე მიიჩნევს, რომ მისი კრიტიკა საფუძვლიანია და ლანძღვასთან საერთო არაფერი აქვს.

"დესტრუქციული არის შეფასება, რომელიც შეურაცხყოფასთან არ არის დაკავშირებული, სუსტი პოზიციები ვთქვი დღეს და ესეც არ არის არანაირად შეურაცხყოფასთან დაკავშირებული. ჩვენთვის აუცილებელია, რომ ვთქვათ სიმართლე, იმ რეალობასთან დაკავშირებით, რომელიც არსებობს. სიმართლე არის ის, 5 თვის განმავლობაში ყოველდღიურ რეჟიმში წარიმართება კამპანია სახელმწიფო საკონსტიტუციო კომისიის, დღეს უკვე საქართველოს პარლამენტის წინააღმდეგ, ეს კამპანია არ ეფუძნება არანაირ ლოგიკას და არანაირ არგუმენტებს."- განაცხადა კობახიძემ.