სასოფლო-სამეურნეო დანიშნულების მიწის გასხვისება - საქართველოს პრემიერ-მინისტრის გიორგი კვირიკაშვილის განცხადებით, მთავრობამ მიიღო გადაწყვეტილება, მიმართოს საკონსტიტუციო კომისიას, რათა კონსტიტუციაში გაკეთდეს ჩანაწერი, რომლის მიხედვითაც სასოფლო-სამეურნეო დანიშნულების მიწის გასხვისება არ იქნება შესაძლებელი იმ პირებზე, რომლებსაც არ აქვთ საქართველოს მოქალაქეობა:

„მმართველ გუნდში გაიმართა კონსულტაციები, რომელშიც მონაწილეობდა მთავრობა და საპარლამენტო უმრავლესობა. მივიღეთ გადაწყვეტილება, საკონსტიტუციო კომისიას მივმართოთ ინიციატივით, რათა კონსტიტუციაში გაკეთდეს ჩანაწერი, რომლის მიხედვითაც სასოფლო-სამეურნეო დანიშნულების მიწის გასხვისება არ იქნება შესაძლებელი იმ პირებზე, რომლებსაც არ აქვთ საქართველოს მოქალაქეობა. სასოფლო-სამეურნეო დანიშნულების მიწებზე, როგორც განსაკუთრებული მნიშვნელობის რესურსზე, საკუთრების უფლება შეიძლება ჰქონდეს საქართველოს მოქალაქეს, საქართველოს მოქალაქეთა გაერთიანებას, სახელმწიფოს და თვითმმართველ ერთეულს. ვფიქრობთ, რომ ეს ჩანაწერი პირდაპირ ეხმიანება იმ მოთხოვნებს, რომელიც ჩვენს მოქალაქეთა უდიდეს უმრავლესობას აქვს და ეს იქნება გადაწყვეტილება, რომელიც აუცილებლად უნდა მიიღოს მმართველმა გუნდმა“-აღნიშნა გიორგი კვირიკაშვილმა.