საკონსტიტუციო ცვლილებები - განხილვები საქართველოს უმაღლეს საკანონმდებლო ორგანოში გრძელდება. დეპუტატები დღეს პროექტზე ადამიანის უფლებათა დაცვის კომიტეტის სხდომაზე იმსჯელებენ.

„მოდელი და პრინციპი, რომელიც ახალ კონსტიტუციაში არის შემოთავაზებული და, რომელსაც ჩვენ ვუჭერთ მხარს, არის ძალიან უბრალო, საიმედო და ფუნქციური. იქმნება თავდაცვის საბჭო, რომლის თავმჯდომარეც არის საქართველოს პრეზიდენტი და მას უნარჩუნდება ეს სტატუსი, ხოლო საომარ ვითარებაში ყოველდღიურ მენეჯმენტს ხელმძღვანელობას უწევს საქართველოს პრემიერ-მინისტრი,“ - განმარტავს არჩილ თალაკვაძე.

ცვლილებებს პრეზიდენტის ინსტიტუტის დისკრიმინაციად აფასებს ოპოზიცია.

„ჩვენნაირი გამოწვევების მქონე ქვეყნისთვის უშიშროების საბჭოს არსებობა არის ფუნდამენტურად მნიშვნელოვანი და ძალიან ბევრი ქვეყნის მაგალითი მეტყველებს ამაზე,“ -აცხადებს სერგი კაპანაძე.

საკონსტიტუციო ცვლილებებს "ხელისუფლების ინტერესებზე მორგებულს" უწოდებს ნაციონალური მოძრაობა.

„ხელისუფლება ცდილობს, საკუთარ ტყავზე მოირგოს ეს კონსტიტუცია. მოსახლეობის დიდი ნაწილი მხარს უჭერს პრეზიდენტის პირდაპირი წესით არჩევის წესს, მაგრამ ხელისუფლება აქაც ძალიან უტიფარია და არ ცდილობს რაიმე კომპრომისის მოძებნას,“ - განაცხადა ენმ-ის წევრმა, ირაკლი ქავთარაძემ.