"არჩევნების გაყალბების მცდელობა - ქართული ოცნება საფრთხეს გრძნობს და კოდექსს საკუთარ თავზე ირგებს"- ენმ

პოლიტიკა - 12:10, 07 Jun, 2017

1127

"ერთიანი ნაციონალური მოძრაობა" მმართველ პოლიტიკური პარტიის მიერ საარჩევნო კანონმდებლობაში შესატან ცვლილებას აპროტესტებს.

როგორც "ნიუპოსტს" პარტიის ერთ-ერთმა ლიდერმა ლევან ბეჟაშვილმა განუცხადა, "ქართული ოცნება" თვითმმართველობის არჩევნების შედეგების შიშით საარჩევნო ადმინისტრაციების დაკომპლექტების წესს ცვლის.

"ხელისუფლება ცდილობს საარჩევნო კოდექსი საკუთარ თავზე მოირგოს. საუბარია საარჩევნო კომისიის დაკომპლექტების წესზე. არსებული რეალობის გათვალისწინებით, ოპოზიციას შანსი უჩნდება, რომ ცენტრალურ საარჩევნო კომისიის წევრების საკმაოდ დიდი წარმომადგენლობა ჰყავდეს და გარკვეულ გადაწყვეტილებაზე ზეგავლენა მოახდინოს. ბუნებრივია ამ საფრთხეს ხედავს "ქართული ოცნება" და წარმოდგენილი აქვთ ცვლილებების პაკეტი, სადაც ოცნება კომისიებში უმრავლესობაში რჩება "- განუცხადა "ნიუპოსტს" ლევან ბეჟაშვილმა.

"ერთიანი ნაციონალური მოძრაობა" საკითხზე არასამთავრობოებთან კონსულტაციის გამართვას გეგმავს. ბეჟაშვილი განმარტავს, რომ ადგილობრივი თუ საერთაშორისო ორგანიზაციებთან მჭიდრო ურთიერთობის შედეგად შეეცდებიან კანონი ძალაში არ შევიდეს, რადგან საარჩევნო კომისიაში მმართველი ძალის წარმომადგენლების უმრავლესობაში ყოფნა არჩევნების გაყალბების შესაძლებლობას იძლევა.

"შევხვდებით არასამთავრობო სექტორს, პოლიტიკური პარტიების წარმომადგენლებს და გვექნება რეაგირება, რადგან ერთხელ და სამუდამოდ უნდა დამთავრდეს ხელისუფლების მიერ წინასაარჩევნოდ საარჩევნო კომისისების დაკომპლექტების წესის საკუთარ თავზე მორგება. შეიძლება ეს წარსულის ცუდი პრაქტიკა იყო, თუმცა ეს პრაქტიკა ბოლო 5 წლის განმავლობაში მკვეთრად გამოიკვეთა"- აღნიშნა დეპუტატმა.

მისი თქმით, უმრავლესობის მიერ ინიცირებულ კანონპროექტში პირდაპირ წერია, რომ თუ ფრაქციის წარმომადგენლობა არ აქვს საარჩევნო სუბიექტს ისინი საარჩევნო კომისიებში წევრებს ვერ დანიშნავენ.

"არადა დღეს მოქმედი კანონით ბარიერგადალახულ პარტიას აქვს უფლება დანიშნოს კომისიის წევრი, სწორედ ამას აუქმებს ქართული ოცნება - ათვლის წერტილი მხოლოდ საპარლამენტო ფრაქციის ყოლა და არჩევნებში მიღებული შედეგებზე მიბმა ხდება"- განმარტა უმცირესობის წევრმა.

საარჩევნო კოდექსში შესატან იმ ცვლილებას რომელიც საარჩევნო ადმინისტრაციების დაკომპლექტების წესს ეხება. სამოქალაქო სექტორიც აპროტესტებს.

არასამთავრობო ორგანიზაციის წევრთა განცხადებით, ცვლილება ერთ კონკრეტულ პარტიაზე, მმართველ გუნდზეა მორგებული.