საქართველოს პარლამენტის თავმჯდომარე, რომელიც საკონსტიტუციო კომისიის თავმჯდომარეც იყო საკონსტიტუციო ცვლილებების ვადებთან და ჩართულობასთან დაკავშირებით პრეზიდენტისგან და არასამთავრობო ორგანიზაციებისგან წამოსულ ინიციატივებს აკრიტიკებს. ირაკლი კობახიძის თქმით პრეზიდენტმა კომისიის მუშაობაში ჩართვა ოთხი თვის განმავლობაში არ ისურვა:

"საუბარი კონსულტაციებზე, ჩართულობასა და ვადებზე იმ ადამიანების მხრიდან, რომლებიც კომისიის მუშაობაში ოთხი თვის განმავლობაში არ მონაწილეობდნენ, რბილად რომ ვთქვათ, ზედმეტია. ამაზე დამატებითი კომენტარების კეთება არ შეიძლება. როგორ შეიძლება, კონსენსუსსა და ვადებზე ის ადამიანი მოგვიწოდებდეს, რომელიც კომისიის მუშაობაში, ოთხი თვის განმავლობაში არ ჩაერთო? ამასთან დაკავშირებით კომენტარების გაკეთება აბსოლუტურად ზედმეტია.” - განაცხადა კობახიძემ.

კობახიძემ თქმით, პროექტთან დაკავშირებით კითხვები დარჩენილი აღარ არის და კონსტიტუციური კანონპროექტი გადაღეჭილია ამიტომ არასამთავრობოების მოწოდება რომ კანონპროექტის განხილვა საშეოდგომო სესიაზე მოხდეს საფუძველს მოკლებულია:

"კითხვები პრაქტიკულად აღარ არის პროექტთან დაკავშირებით დარჩენილი, გადაღეჭილია კონსტიტუციური კანონი, ახალი დოკუმენტი ისეა მომზადებული, რომ თითოეული მუხლი ზედმიწევნით გავლილია. ეს მოწოდება საფუძველს მოკლებულია. სამი რაუნდი ჩავატარეთ და საკომიტეტო განხილვებს ვატარებთ, რომელსაც პლენარული განხილვები დაემატება. კონსტიტუციის გადასინჯვის პროექტს ამაზე მეტად ფიზიკურად ვერ განიხილავ. აქედან გამომდინარე, როცა რაღაცისკენ მოგვიწოდებენ, მოწოდება დასაბუთებული უნდა იყოს. ეს მოწოდება დასაბუთებული არ არის.“ - აღნიშნა კობახიძემ.