"მაჟორიტარული სისტემის შენარჩუნება ხელისუფლებაზე ჩაბღაუჭების მცდელობაა"- აბესაძე

პოლიტიკა - 19:40, 06 Jun, 2017

1084

მმართველი გუნდის მხრიდან წამოსულ მოსაზრებებს მაჟორიტარული სისტემის შენარჩუნებასთან დაკავშირებით, „ევროპული საქართველოს“ წევრი ირაკლი აბესაძე გამოეხმაურა. აბესაძის თქმით, მაჟორიტარული სისტემის შენარჩუნება ხელისუფლებაზე ჩაბღაუჭების მცდელობაა:

,,მას შემდეგ, რაც როგორც ჩანს, ისინი ვერ ახერხებენ საერთაშორისო საზოგადოების თუ ქვეყნის შიგნით მომუშავე არასამთავრობო ორგანიზაციების, პოლიტიკური პარტიების დარწმუნებას და მოტყუებას კვლავ ალაპარაკდნენ მაჟორიტარული სისტემის შენარჩუნებაზე, ანუ ხელისუფლებაზე ჩაბღაუჭების მცდელობაზე’’- განაცხადა ირაკლი აბესაძემ.

აბესაძის თქმით ხელისუფლების მიერ შემოთავაზებული სისტემაც ბევრ ხარვეზს შეიცავდა და სისტემა რეალურად ითვალისწინებდა შესაძლებლობას, რომ ხელისუფლება მცირე საარჩევნო მხარდაჭერის მქონე პოლიტიკური პარტიის მიერ ყოფილიყო მითვისებული:

,,გადაწყვეტილება საარჩევნო სისტემის შეცვლის შესახებ არ მიიღება პარლამენტის შენობაში და იმ საპარლამენტო უმრავლესობის მიერ, რომელიც დღეს განცხადებებს აკეთებს. გადაწყვეტილებას იღებს ივანიშვილი. აქედან გამომდინარე, დღეს საუბარი მაჟორიტარული სისტემის შენარჩუნებაზე კიდევ ერთხელ ხაზს უსვამს, რომ მათ მიერ შემოთავაზებული თითქოს სამართლიანი პროპორციული საარჩევნო სისტემა რეალურად ითვალისწინებდა შესაძლებლობას მითვისებული ყოფილიყო ხელისუფლება მცირე საარჩევნო მხარდაჭერის მქონე პოლიტიკური პარტიის მიერ.’’ - განაცხადა ირაკლი აბესაძემ.