"მთავრობა იცავს არა ქვეყნის და ადამიანის ინტერესს, არამედ თავის გუნდს აფარებს ხელს"- ხოშტარია მუხთარლის საქმეზე

პოლიტიკა - 13:06, 06 Jun, 2017

1186

ევროპული საქართველოს წევრის ელენე ხოშტარიას თქმით, ადამიანის უფლებების კომიტეტის თავმჯდომარე ნაცვლად იმისა, რომ გვერდში ედგეს პროტესტს და მთავრობას მოსთხოვოს პასუხი, აფგან მუხთარლის საქმესთან დაკავშირებულ პროტესტს შოუს უწოდებს და პროტესტის მონაწილე ხალხს უპირისპირდება. აღნიშნული განცხადება ხოშტარიამ პარლამენტში ადამიანის უფლებების კომიტეტზე აზერბაიჯანელი ჟურნალისტის საკითხთის განხილვასთან დაკავშირებით გააკეთა:

,,დღეს ჟურნალისტებმა ჩაიდინეს ყველასთვის მნიშვნელოვანი ღირსეული აქტი - იცავენ ქვეყნის ღირსებას. ამ ქვეყანაში თუ არ არის მთავრობა არის ძლიერი საზოგადოება, რომელიც ასე მტკიცედ აპროტესტებს წარმოუდგენელ ადამიანის ქვეყნიდან გაქრობის შემთხვევას. ძალიან კარგად ჩანს მთავრობის დამოკიდებულება. რამდენი დღე არის გასული. უამრავი კამერა დაითვალეს ჟურნალისტებმა, რომელიც იმ ტერიტორიაზე იყო. არც ერთ კითხვაზე პასუხი არ გვაქვს. არის ცინიკური განცხადებები მთავრობის მხრიდან. ეს არის რა თქმა უნდა სიმახინჯე ჩვენი სახელმწიფო სისტემის, რომელიც არსებობს და სადაც მთავრობა იცავს არა ქვეყნის და ადამიანის ინტერესს, არამედ თავის გუნდს აფარებს ხელს.’’ - განაცხადა ელენე ხოშტარიამ.