„კობახიძემ დაადასტურა, რომ საკონსტიტუციო კომისიის საქმიანობა იყო ანგარიშსწორება პრეზიდენტ მარგველაშვილზე“- აბაშიშვილი

პოლიტიკა - 14:14, 05 Jun, 2017

934

საქართველოს პრეზიდენტის ადმინისტრაციის უფროსი გიორგი აბაშიშვილი პარლამენტის თავმჯდომარის ირაკლი კობახიძის მიერ დღეს გაკეთებულ განცხადებას ეხმაურება და აღნიშნავს, რომ საკონსტიტუციო კომისიის შექმნიდან 6 თვის შემდეგ კიდევ ერთხელ დაადასტურა, რომ საკონსტიტუციო კომისიის საქმიანობის სულისკვეთება რეალურად იყო ანგარიშსწორება პრეზიდენტ მარგველაშვილზე.

„მივესალმები საქართველოს პარლამენტის თავმჯდომარის განცხადებას, იმასთან დაკავშირებით, რომ პარლამენტი არ განიხილავს პირველი მოსმენით საკონსტიტუციო ცვლილებებს ვენეციის კომისიის დასკვნამდე და ძალიან მნიშვნელოვანია, რომ ეს ელემენტარული ჭეშმარიტება იქნა გათვალისწინებული. რაც შეეხება კობახიძის განცხადებას, პრეზიდენტის და პრეზიდენტის ადმინისტრაციის მიმართ, საქართელოს პარლამენტის თავმჯდომარემ, საკონსტიტუციო კომისიის შექმნიდან ექვსი თვის შემდეგ, კიდევ ერთხელ დაადასტურა, რომ საკონსტიტუციო კომისიის შექმნის და საქმიანობის სულისკვეთება რეალურად იყო ანგარიშწორება ერთ კონკრეტულ პოლიტიკოსზე, პრეზიდენტ მარგველაშვილზე. რაც შეეხება მის მიერ ნახსენებ სიტყვა კომპრომისს, ეს არის არასწორი სიტყვა, რადგან კომპრომისი არავის არ უთხოვია. ქართველი ხალხის ნებასურვილი არის გამოთქმული და ეს არის, რომ მათ სურთ, უნდათ აირჩიეონ პრეზიდენტი პირდაპირი წესით და მათი ეს სურვილი არ შეეხება 2018 წლის მარგველაშვილის არჩევას. ქართველ ხალხს სურს პრეზიდენტის პირდაპირი წესით არჩევა 2018 წელს, 2023 წელს და ყოველ შემდგომ წელს. შესაბამისად, ჩვენ არცერთ შემთხვევაში არ ვაპირებთ ქართველი ხალხის ნებით და ამ უფლებით ვაჭრობას“- განაცხადა გიორგი აბაშიშვილმა.