აფგან მუხტარლის საქმე - ოპოზიცია შს მინისტრს და სუს-ის ხელმძღვანელს პარლამენტში იბარებს

პოლიტიკა - 10:05, 05 Jun, 2017

1477

საპარლამენტო ოპოზიცია შს მინისტრს და სუს-ის ხელმძღვანელს აფგან მუხტარლის საქმესთან დაკავშირებით, პარლამენტში იბარებს.

ევროპული საქართველოში აცხადებენ, რომ მათთან შეხვედრის შემდეგ გადაწყვეტენ, დაუჭერენ თუ არა მხარს პასუხისმგებლობის დაყენების საკითხს.

„არავის არ უნდა ჰქონდეს ილუზია იმასთან დაკავშირებით, რომ დღევანდელი პროკურატურა, რომლის დროსაც გამოუძიებელი საქმეების რაოდენობა ყველა რეკორდს ხსნის, რამეს გამოიძიებს. ვფიქრობ, რომ ჩვენ, ალბათ, უნდა წავიდეთ სხვა გზით. პირადად ჩვენ პირველი ნაბიჯები გადავდგით იქითკენ, რომ ევროპულმა საქართველომ დაიბარა ძალოვანი უწყებების მინისტრები პარლამენტში,“ - აცხადებს სერგო რატიანი.

ნაციონალური მოძრაობა კი ჟურნალისტის საქმეზე გიორგი მღებრიშვილისა და ვახტანგ გომელაურის თანამდებობრივ პასუხისმგებლობის საკითხის დაყენებას ითხოვს.

„როგორ უნდა მჯეროდეს ამ ხელისუფლების, როდესაც, როგორც ჩანს, ამ ხელისუფლებამ ხელი შეუწყო ამ სამარცხვინო გატაცებას. ხელისუფლების ნაწილმა ამაში მონაწილეობა თვითონ მიიღო. თუ ჭკუა აქვთ, ეს დროზე უნდა გამოიძიონ თვითონ და დამნაშავეები დასაჯონ. ამის იმედი, სამწუხაროდ, მე არ მაქვს,“ - განაცხადა ნიკა რურუამ.

საპარლამენტო უმრავლესობა კი ოპონენტებს ურჩევს, გამოძიების დასრულებას დაელოდონ.

„არ არსებობს საკითხი, როდესაც ნაციონალური მოძრაობა და ნეონაციონალური მოძრაობა პირს არ შეკრავენ და რაღაც ხალიჩაზე არ ეძახიან სამთავრობო სტრუქტურებს, რათა შეტევა მიიტანონ ახლა უკვე პარლამენტის ფორმატში. ამ თემაზე ძიება აუცილებელია, მაგრამ ახლა, პირველ ეტაპზე, რაც აშკარად იკვეთება, ეს ის არის, რომ ჩვენი სამართალდამცავი სტრუქტურები როგორც მოქმედებდნენ პროფესიონალურად, ისევე მოქმედებენ,“ - აღნიშნავს გია ვოლსკი.