აფგან მუხთარლის გატაცება და მიკაილ კადიევის საქმე - ,,ამ ფაქტს სუბარის, შსს და სუს-ის ხელმძღვანელობის გადადგომა უნდა მოჰყვეს“

პოლიტიკა - 16:06, 04 Jun, 2017

5208

აზერბაიჯანელი ჟურნალისტის გატაცებაში მაღალჩინოსნების შესაძლო მონაწილეობას არ გამორიცხავენ საზოგადოებრივი ორგანიზაციების წარმომადგენლები. ,,აფხაზთა კრების“ წევრი და ორგანიზაცია ,,დაბრუნების“ ლიდერი მალხაზ პატარაიას თქმით, ამაზე მიუთითებს აშშ-ს სახელმწიფო დეპარტამენტის განცხადება. პატარაია მიკაილ კადიევის საქმესაც იხსენებს და ამბობს, რომ 2013 წელს ის სწორედ ქართულმა სპეცსამსახურებმა გაიტაცეს რუსეთისთვის ადასაცემად.

,,ეჭვი არ მეპარება, რომ აზერბაიჯანელი ჟურნალისტის აფგან მუხთარლის გატაცებაში ხელისუფლების ხელი ურევია და ეს ძალიან მაღალ დონეზე გადაწყდა. საზოგადოებისათვის ცნობილი ყველა არსებული ინფორმაცია ამაზე მიუთითებს და აშშ-ს სახელმწიფო დეპარტამენტის განცხადების ასეთი მკაცრი ტონიც.

ეს პირველი შემთხვევა არ არის. უკვე მეოთხე წელია ვიცავთ დაღესტნელ უფლებადამცველს მიკაილ კადიევს. იმ უფლებადამცველთა ჯგუფიდან, რომელიც უმძიმეს პირობებში ლეგალურად საქმიანობდა დაღესტანში, ოთხი რუსეთის ხელისუფლებამ პირდაპირი მნიშვნელობით დახვრიტა. დარჩა მხოლოდ მიკაილ კადიევი, რომელიც არაერთხელ აწამეს, სასწაულებრივ გადაურჩა სიკვდილს და საქართველოს შეაფარა თავი. 2013 წელს ქართულმა სპეცსამსახურებმა ის ბათუმში გაიტაცეს რუსეთისათვის გადასაცემად, მაგრამ გზიდან გაექცათ. შემდეგ იარაღი და აასაფეთქებელი მასალა ჩაუდეს და ტერორიზმის ბრალდება წაუყენეს. რომელიც იმდენად უსუსური იყო, რომ მოუხსნეს და 2 წელი სრულიად უდანაშაულოდ ციხეში ჰყავდათ გამოკეტილი მხოლოდ იმიტომ, რომ არ გატყდა და არ დაემორჩილა ხელისუფლების მოთხოვნას, ცილი დაეწამებინა ყოფილი ხელისუფლების წარმომადგენლებისათვის, თითქოს ის ამ უკანასკნელებმა ტერორისტული აქტების მოსაწყობად ჩამოიყვანეს საქართველოში.

მიკაილ კადიევმა საქართველოში თავშესაფარი ითხოვა, მაგრამ მას სოზარ სუბარის უწყება ჯიუტად არ აძლევს თავშესაფარს და რუსეთში ექსტრადიციისათვის ჰყავს განწირული. კადიევს უკვე ორჯერ ეთქვა უარი თავშესაფრის მიცემაზე. პირველი უარი საზოგადოებრივი პროტესტის გამო და სასამართლოს გადაწყვეტილებით ბათილად იქნა ცნობილი. მაგრამ ლტოლვილთა სამინისტრომ სასამართლოს მრავალრიცხოვანი სავალდებულო მითითებებების სრული იგნორირებით, ხელახლა ახალი, აბსოლუტურად უკანონო უარი გამოაცხო და საქმე ისევ სასამართლოშია. ამავე დროს, როგორც გავარკვიეთ და ეს სასამართლო პროცესებზეც ითქვა, სამინისტროდან გაჟონა კონფიდენციალურმა ინფორმაციამ მიკაილ კადიევის უფლებადაცვითი საქმიანობის შესახებ, რაც დაღესტანში მისი იქაური მეგობრების ახალი რეპრესიების საფუძველი გახდა.

მინისტრი ჯეჯელავას უკბილო თავისმართლებები საქმეს ვერ უშველის. ამ უაღრესად აღმაშფოთებელ და სამარცხვინო ფაქტს შსს და სუსი-ს და ხელმძღვანელების სასწრაფო გადაგომა და სისხლის სამართლის პასუხისმგებლობა უნდა მოჰყვეს. იგივე უნდა მოუვიდეს ლტოლვილთა ყველაზე უღირს მინისტრ სუბარსაც, რომელმაც საქართველოში პოლიტიკური ნიშნით დევნილთათვის თავშესაფარზე უარის კონვეირი გახსნა.

ასე იქნებ ცოტათი მაინც ეშველოს ჩვენი ქვეყნის უღრესად შელახულ ავტორიტეტს უცხოეთში და ჩვენს სახელმწიფოს, რომელსაც ეს ვაჟბატონები და მათი ბელადი სრულ ჩამოშლას უპირებენ“ - აცხადებს მალხაზ პატარაია.