"უცხოელებზე მიწის გასხვისება მაქსიმალურად უნდა შევზღუდოთ"- დარგობრივი ეკონომიკის კომიტეტის თავმჯდომარე

პოლიტიკა - 13:05, 03 Jun, 2017

2059

პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარემ რომან კაკულიამ მიწის საკუთრებასთან დაკავშირებით საკანონმდებლო ინიციატივასთან დაკავშირებით ბრიფინგი გამართა. კაკულიას თქმით დღეს მოქმედი კონსტიტუცია თანაბარ პირობებში აყენებს როგორც საქართველოს, ისე უცხო ქვეყნის მოქალაქეებს, ამიტომ აუცილებელია, შემუშავდეს რაიმე მექანიზმი, რომელიც უცხო ქვეყნის მოქალაქეებზე მიწების გასხვისებას აკრძალავს მანამ, სანამ ეს საკითხი ახალი კონსტიტუციითა და შემდგომში უკვე ორგანული კანონით არ დარეგულირდება. მთავრობის გადაწყვეტილებით, სასოფლო სამეურნეო დანიშნულების მიწის უცხოელებზე გასხვისების საკითხს საკონსტიტუციო ცვლილებამდე, სპეციალური კანონი დაარეგულირებს, რომლის საკანონმდებლო პაკეტი პარლამენტში განხილვაზე უკვე შევიდა. პროექტის მიხედვით, სასოფლო სამეურნეო მიწის მესაკუთრე პირი მხოლოდ იმ შემთხვევაში შეიძლება იყოს, თუ მიწა მემკვიდრეობით აქვს მიღებული, ან აღნიშნული მიწა არის მისი საქართველოს მოქალაქესთან ქორწინებით, ან საქართველოს მოქალაქის კომლის წევრობის შედეგად მოპოვებული თანასაკუთრების ობიექტი.

"ეს თემა რამდენიმე მოცემულობისგან შედგება - პირველი არის ის, რომ დღეისთვის არსებობს კონსტიტუცია, რომელიც თანაბარ დაშვებას აკეთებს როგორც უცხოეთის მოქალაქეზე, ისე საქართველოს მოქალაქეზე საკუთრებასთან მიმართებაში, ასევე მიწის მიმართ. ინიციატივა, რომელიც დღეისთვის გახდა სხვადასხვანაირი ინტერპრეტაციის საკითხი, გულისხმობს იმას, რომ ახალი კონსტიტუციის მიღებამდე, არსებული კონსტიტუციის ფარგლებში გააკეთოს მაქსიმუმი, რათა მიღწეული იქნას მთავარი მიზანი. მთავარი მიზანი არის ის, რომ უცხოეთის მოქალაქეებზე აიკრძალოს სასოფლო-სამეურნეო მიწების გასხვისება, ასევე იურიდიული პირებისთვის დაშვება იქნეს იმ შემთხვევაში, როდესაც საქართველოს მოქალაქეები არიან 50%-ზე მეტი წილის მფლობელი. თემა აიწია და შესაძლებელია კონსტიტუციის მიღებამდე დაჩქარდეს გასხვისების პროცესი და ამის დარეგულირებას ემსახურება ეს ახალი ინიციატივა. ჩვენ ამ საკანონმდებლო ინიციატივით გვინდა მაქსიმალურად ავკრძალოთ და შევზღუდოთ უცხოელ ფიზიკურ პირებზე მიწის გასხვისება. რაც შეეხება ახალ კონსტიტუციას, ჩემი აზრით, აუცილებელია, რომ კონსტიტუციამ დააზუსტოს აუცილებლად, თუ ვის ექნება დაშვება მიწის საკუთრებაზე. მე ვფიქრობ, ეს უნდა იყოს აუცილებლად საქართველოს მოქალაქე, საქართველოს მოქალაქეებისგან შემდგარი გაერთიანება, იურიდიული პირები, რომლის დამფუძნებელთა 50%-ზე მეტი არიან საქართველოს მოქალაქეები, მოხსენიებული იქნება მიწის მფლობელობა როგორც იურიდიულ, ისე სახელმწიფო საკუთრებაში“- განაცხადა კაკულიამ.