ვფიქრობ ქართველი ოფიციალური პირები აფგან მუხთარლის საქმის სერიოზულობას სრულად აცნობიერებენ

ვფიქრობ ქართველი ოფიციალური პირები აფგან მუხთარლის საქმის სერიოზულობას სრულად აცნობიერებენ - კელი

პოლიტიკა - 11:06, 03 Jun, 2017

5181

აზერბაიჯანელი ჟურნალისტის აფგან მუხთარლის საქმეს საქართველოში ამერიკის შეერთებული შტატების ელჩი გამოეხმაურა. იან კელის თქმით საქართველოს ხელისუფლების წარმომადგენლები დიპლომატიურ კორპუსს საქმის სრულყოფილად და დეტალურად გამოძიებას დაპირდა.

„ეს ნამდვილად სერიოზული ბრალდებებია. ჩვენ, რა თქმა უნდა, გვქონდა კონტაქტი საქართველოში ოფიციალურ პირებთან, რომლებიც დაგვპირდნენ, რომ აფგან მუხტარლის ირგვლივ განვითარებულ გარემოებებს დეტალურად და სრულყოფილად გამოიძიებენ.

ვფიქრობ, ისინი ბრალდებების სერიოზულობას სრულად აცნობიერებენ, მათ დაგვარწმუნეს, რომ თბილისში მცხოვრები აზერბაიჯანელი მოქალაქეებისა და უფლებადამცველების უფლებები იქნება დაცული და მთავრობა დიდ ყურადღებას აქცევს მათ უსაფრთხოებას“, - განაცხადა იან კელიმ.

გუშინ შს მინისტრის მოადგილე შალვა ხუციშვილი, სახელმწიფო უსაფრთხოების სამსახურის უფროსის მოადგილეები - იოსებ გოგაშვილი და ალექსანდრე ტაბატაძე საქართველოში აკრედიტებული დიპლომატიური კორპუსის წარმომადგენლებს შეხვდნენ, შეხვედრაზე დიპლომატიური კორპუსის წარმომადგენლებს აზერბაიჯანის მოქალაქე აფგან მუხთარლის საქმესთან დაკავშირებით მიმდინარე გამოძიების შესახებ ინფორმაციას მიაწოდეს.

შეგახსენებთ 29 მაისს საღამოს თბილისში აზერბაიჯანელი აქტივისტი და ჟურნალისტი აფგან მუხთარლი გაუჩინარდა, როგორც მისი ადვოკატის მიერ გავრცელებული ინფორმაციით ირკვევა, თბილისში, საკუთარ სახლთან დააკავეს და ძალით ჩასვეს მანქანაში. ადვოკატის ინფორმაციით, დამკავებლებს თავი არ წარუდგენიათ, თუმცა, მუხთარლის აზრით, ისინი საქართველოს სპეცსამსახურების თანამშრომლები იყვნენ. როგორც აფგან მუხთარლის ადვოკატი აცხადებს, მისი დაცვის ქვეშ მყოფ პირს ტომარა ჩამოაცვეს თავზე და დაახლოებით ორი საათის განმავლობაში მიჰყავდათ მანქანით გაურკვეველი მიმართულებით. მანქანა ორჯერ გამოიცვალეს. მუხთარლის თქმით, მესამე მანქანაში აზერბაიჯანულად ლაპარაკობდნენ. აზერბაიჯანელი ჟურნალისტის სიტყვებით, როცა მას ტომარა მოხსნეს, იგი აზერბაიჯანის სასაზღვრო-გამშვებ პუნქტში იმყოფებოდა. მუხთარლის თქმით, მას 10 ათასი ევრო ჩაუდეს. აზერბაიჯანის ხელისუფლება საზღვრის უკანონოდ გადაკვეთისა და კონტრაბანდის ბრალდებებს უყენებს. აფგან მუხთარლი და მისი მეუღლე, ჟურნალისტი ლეილა მუსტაფაევა, მათი განმარტებით, ჟურნალისტური საქმიანობისა და კრიტიკული პოზიციების გამო, აზერბაიჯანის ხელისუფლების მხრიდან სისტემურ დევნასა და შევიწროებას განიცდიდნენ.