"რეპორტიორები საზღვრებს გარეშე" საქართველოს ხელისუფლებისგან აფგან მუხთარლის საქმეზე განმარტებებს ითხოვს

პოლიტიკა - 14:27, 02 Jun, 2017

1301

ორგანიზაციის „რეპორტიორები საზღვრებს გარეშე“ განცხადებით, საქართველოს ხელისუფლებას მოუწევს განმარტოს, თუ როგორ მოხვდა საქართველოში მცხოვრები აზერბაიჯანელი ჟურნალისტი აფგან მუხთარლი აზერბაიჯანში. ორგანიზაცია მოითხოვს აზერბაიჯანული მხარის მიერ ჟურნალისტის დაუყოვნებლივ გათავისუფლებას.

საქართველოში ცხოვრების დროს, აფგან მუხთარლი და მისი მეუღლე, ლეილა მუსტაფაევა აზერბაიჯანის ხელისუფლებისა და ილჰამ ალიევის ოჯახის ბიზნესინტერესებისა და კორუფციული სქემების შესახებ კრიტიკულ სტატიებს აქვეყნებდნენ.

შეგახსენებთ 29 მაისს საღამოს თბილისში აზერბაიჯანელი აქტივისტი და ჟურნალისტი აფგან მუხთარლი გაუჩინარდა, როგორც მისი ადვოკატის მიერ გავრცელებული ინფორმაციით ირკვევა, თბილისში, საკუთარ სახლთან დააკავეს და ძალით ჩასვეს მანქანაში. ადვოკატის ინფორმაციით, დამკავებლებს თავი არ წარუდგენიათ, თუმცა, მუხთარლის აზრით, ისინი საქართველოს სპეცსამსახურების თანამშრომლები იყვნენ. როგორც აფგან მუხთარლის ადვოკატი აცხადებს, მისი დაცვის ქვეშ მყოფ პირს ტომარა ჩამოაცვეს თავზე და დაახლოებით ორი საათის განმავლობაში მიჰყავდათ მანქანით გაურკვეველი მიმართულებით. მანქანა ორჯერ გამოიცვალეს. მუხთარლის თქმით, მესამე მანქანაში აზერბაიჯანულად ლაპარაკობდნენ. აზერბაიჯანელი ჟურნალისტის სიტყვებით, როცა მას ტომარა მოხსნეს, იგი აზერბაიჯანის სასაზღვრო-გამშვებ პუნქტში იმყოფებოდა. მუხთარლის თქმით, მას 10 ათასი ევრო ჩაუდეს. აზერბაიჯანის ხელისუფლება საზღვრის უკანონოდ გადაკვეთისა და კონტრაბანდის ბრალდებებს უყენებს. აფგან მუხთარლი და მისი მეუღლე, ჟურნალისტი ლეილა მუსტაფაევა, მათი განმარტებით, ჟურნალისტური საქმიანობისა და კრიტიკული პოზიციების გამო, აზერბაიჯანის ხელისუფლების მხრიდან სისტემურ დევნასა და შევიწროებას განიცდნენ.