"ხელისუფლება ურთიერთგამომრიცხავი განცხადებებით ფონს ვერ გავა, პასუხისგება მოუწევთ"- ელისაშვილი აზერბაიჯანელი ჟურნალისტის საქმეზე

პოლიტიკა - 11:36, 02 Jun, 2017

1635

საკრებულოს დამოუკიდებელი დეპუტატი ხელისუფლებას მოუწოდებს აზერბაიჯანელი ჟურნალისტის აფგან მუხთარლის დაკავებისა და თბილისიდან აზერბაიჯანში გადაყვანის შესახებ საზოგადოებას დეტალური ინფორმაცია მიაწოდოს.

დეპუტატის თქმით, საქართველოს ხელისუფლების წარმომადგენლები ბოლო ორი დღეა საქმეზე ურთიერთგამომრიცხავ კომენტარებს აკეთებენ.

"ხელისუფლება ორი დღეა ერთმანეთისგან გამომრიცხავ კომენტარებს აკეთებს, ისინი კონკრეტულ აზრზე ვერ ჩამოყალიბდნენ. იმის ნაცვლად, რომ გამოძიების დეტალები, ის, რაც რეალურად მოხდა, საზოგადოებას მიაწოდონ, აზერბაიჯანულ პრესას პირდაპირ ეთერში გვიკითხავენ. ასეთი რაღაცეებით ისინი ფონს ვერ გავლენ და ადრე თუ გვიან პასუხისგება მოუწევთ"- განაცხადა ალეკო ეისაშვილმა.

მისი თქმით, "აზერბაიჯანელი ჟურნალისტის ბანდიტურად გატაცებაში ხელისუფლებას მოუწევს პასუხისგება. თანამდებობის დატოვება მოუწევს ჯეჯელავას და ყველა ძალოვანს, ვინც ამაში იყო ჩართული".

"სესიაშვილის განცხადება ინდურ სცენარს ჰგავს. მღებრიშვილის განცხადება აზერბაიჯანული პრესის მიმოხილვა იყო, ხოლო “სნეგურაჩკა” კაცზე კი, საუბარი საერთოდ აღარ ღირს. ხელისუფლებას მოუწევს პასუხისგება, ჯეჯელავას და ყველა ძალოვანს თანამდებობის დატოვება, ვინც ამაში ჩართული იყო”, - განაცხადა საკრებულოს დამოუკიდებელმა დეპუტატმა ალეკო ელისაშვილმა.

პარლამენტთან აზერბაიჯანელი ჟურნალისტის აფგან მუხთარლის სოლიდარობის აქცია იმართება. ადგილზე შეკრებილებმა საკანონმდებლო ორგანოში განცხადება შეიტანეს და ჟურანლისტის გაუჩინარების საქმეზე საპარლამენტო კონტროლის განხორციელებას მოითხოვეს.

სამოქალაქო სექტორი ითხოვს, გაირკვეს როგორ მოხვდა ჟურნალისტი აზერბაიჯანში და დადგინდეს პასუხისმგებელ პირთა ვინაობა.