ე.წ. ციანიდის საქმეზე ოპოზიციის რიგებში განცხადებები კეთდება, მათი ტქმით ხელისუფლება და ბიძინა ივანიშვილი ცდილობენ ეკლესიაზე გავლენის მოპოვებას. ენმ-ს რიგებში დარწმუნებულნი არიან, რომ საქმის ობიექტური გამოძიება არ მოხდება:

„საპატრიარქოს ებრძვის ბიძინა ივანიშვილი თავისი ჯიბის მთავრობით, რომელიც მიზნად ისახავს ყველა იმ ინსტიტუტის განადგურებას, რომელსაც გააჩნია გავლენა და არის თავისუფალი. მუდმივად გვესმის ჩვენ საუბარი ცილისწამებაზე, მუქარაზე, კომპრომატებით შანტაჟზე. სამწუხაროა, რომ საქართველოს ხელისუფლება დაჰყვა ოლიგარქის მაფიოზურ მმართველობას და ამ უბინძურეს ბრძოლაში ჩაერთო,“ - ამბობს კოტე იოსელიანი.

აღნიშნულ საქმეზე საუბრობენ „ევროპულ საქართველოშიც“:

„ხელისუფლებას სურს გავლენა მოიპოვოს ეკლესიაზე. არ ერიდება არაფერს. პირველივე დღიდან, როგორც კი დაიწყო ეს მოვლენები, ჩვენ ვნახეთ, რომ ინიციატივა ჰქონდა პირდაპირ ხელში აღებული ხელისუფლებას, პროკურატურამ გაავრცელა ყალბი ცნობები. ცდილობენ, რომ შეიყვანონ შეცდომაში საზოგადოება და პროცესები მართონ,“ - აცხადებს სერგო რატიანი.

რაც შეეხება საპარლამენტო უმრავლესობას, მათ რიგებში ოპოზიციის მხრიდან გაკეთებულ განცხადებებს ხელოვნურ აჟიოტაჟად აფასებენ:

„ჩვენ უდანაშაულობის პრეზუმფციაც ვიცით რა არის, ვიცით, რომ გამოძიება უნდ იყოს ობიექტური სამართლიანი და მართლმსაჯულება რეალურად აღსრულდეს. აქედან გამომდინარე, პროცესს უნდა დაველოდოთ. მე არ მგონია, რომ ეს აჟიოტაჟი, რომელიც ამ საქმის გარშემო არის ზოგადად, საგამოძიებო პროცესისთვის და მართლმსაჯულებისთვის სასარგებლო იყოს,“ - განაცხადა გედევან ფოფხაძემ.