აზერბაიჯანელი ჟურნალისტის საქმე - საქართველოს იუსტიციის მინისტრის თეა წულუკიანის განცხადებით გამოძიება სირთულეების სავსე იქნება, მაგრამ წინ უნდა წავიდეს და სწრაფად, ეფექტიანად დადგინდეს თუ რა მოხდა. ამის შესახებ სახელმწიფო მინისტრმა გუშინ „საზოგადოებრივი მაუწყებლის“ პირდაპირ ეთერში, გადაცემა „მტავარში“ ისაუბრა:

„საგამოძიებო პროცესი ყოველგვარი დახანების გარეშე დაიწყო. ის, რომ ეს ადამიანი არის უკვე სხვა ქვეყანაში, გაართულებს გამოძიებას. ის ძვირფასი ინფორმაცია, რაც გამოძიებას შეიძლება დასჭირდეს, მხოლოდ აფგანმა იცის, რომელიც ბაქოშია. ანუ - ვინ იყვნენ ეს ადამიანები, რომლებმაც, როგორც მისი ადვოკატი გვატყობინებს, ჩასვეს მანქანაში და სცემეს კიდეც, გააქანეს საზღვირსკენ. ვინ იყვნენ, თუ იცნობდა მათ, რა აკავშირებდა მათთან, რა ენაზე საუბრობდნენ.

უშუალოდ ეს ფაქტი არის ძალიან უსიამოვნო. სამართლებრივ ენაზე რაც ირკვევა, ამ ეტაპზე ალბათ უნდა დაკვალიფიცირდეს დანაშაულად. სწორედ ამ ვარაუდის გამო დაიწყეს ჩვენი ქვეყნის საგამოძიებო ორგანოებმა გამოძიება თავისუფლების უკანონოდ აღკვეთის მუხლით, თუმცა გამოძიების პროცესში შესაძლოა, სხვა მუხლებიც შემოვიდეს გამოყენების სფეროში“, - განაცხადა თეა წულუკიანმა.

აფგან მუხთარლი თბილისში 29 მაისს, საღამოს გაუჩინარდა. მოგვიანებით, გაირკვა, რომ ის ბაქოში, სახელმწიფო საზღვრის სამსახურის საგამოძიებო განყოფილებაში იმყოფებოდა. ჟურნალისტს სასამართლომ სამთვიანი წინასწარი პატიმრობა შეუფარდა, აღნიშნულს ადვოკატები დღეს სააპელაციო სასამართლოში გაასაჩივრებენ, ხოლო იმ შემთხვევაში თუ არ მოხდება მათი სარცელის დაკმაყოფილება, უფლებადამცველები სტრასბურგის სასამართლოს მიმართავენ.