"კონკრეტული ადამიანების პასუხისმგებლობის საკითხი აუცილებლად უნდა დადგეს"- ჯაფარიძე აფგან მუხთარლის საქმეზე

პოლიტიკა - 18:18, 31 May, 2017

1307

აზერბაიჯანელი ჟურნალისტის, აფგან მუხთარლის სკანდალურ საქმეს პარტია „გირჩის“ ლიდერი ზურაბ ჯაფარიძე გამოეხმაურა. ჯაფარიძის თქმით აღნიშნულ ფაქტთან დაკავშირებთ ხელისუფლებამ განმარტებები უნდა გააკეთოს და კონკრეტული ადამიანების პასუხისმგებლობის საკითხი აუცილებლად უნდა დადგეს:

„თუ ჩვენ ვაშენებთ ნორმალურ სახელმწიფოს, სადაც ადამიანის უფლებები არის დაცული, ადამიანის უფლები არ განარჩევდეს ადამიანებს მათი მოქალაქეობის ან რაიმე სხვა ნიშნით. ყველა ადამიანის უფლება უნდა იქნას დაცული. პირველ რიგში, ამ შენობიდან უნდა გამოვიდნენ ადამიანები და გვითხრან რა მოხდა. ვფიქრობ, კონკრეტული ადამიანების პასუხისმგებლობის საკითხი აუცილებლად უნდა დადგეს“.- განაცხადა ზურაბ ჯაფარიძემ აფგან მუხთარლის მხარდასაჭერად კანცელარიასთან გამართული აქციაზე.

შეგახსენებთ 29 მაისს საღამოს თბილისში აზერბაიჯანელი აქტივისტი და ჟურნალისტი აფგან მუხთარლი გაუჩინარდა, როგორც მისი ადვოკატის მიერ გავრცელებული ინფორმაციით ირკვევა, თბილისში, საკუთარ სახლთან დააკავეს და ძალით ჩასვეს მანქანაში. ადვოკატის ინფორმაციით, დამკავებლებს თავი არ წარუდგენიათ, თუმცა, მუხთარლის აზრით, ისინი საქართველოს სპეცსამსახურების თანამშრომლები იყვნენ. როგორც აფგან მუხთარლის ადვოკატი აცხადებს, მისი დაცვის ქვეშ მყოფ პირს ტომარა ჩამოაცვეს თავზე და დაახლოებით ორი საათის განმავლობაში მიჰყავდათ მანქანით გაურკვეველი მიმართულებით. მანქანა ორჯერ გამოიცვალეს. მუხთარლის თქმით, მესამე მანქანაში აზერბაიჯანულად ლაპარაკობდნენ. აზერბაიჯანელი ჟურნალისტის სიტყვებით, როცა მას ტომარა მოხსნეს, იგი აზერბაიჯანის სასაზღვრო-გამშვებ პუნქტში იმყოფებოდა. მუხთარლის თქმით, მას 10 ათასი ევრო ჩაუდეს. აზერბაიჯანის ხელისუფლება საზღვრის უკანონოდ გადაკვეთისა და კონტრაბანდის ბრალდებებს უყენებს. აფგან მუხთარლი და მისი მეუღლე, ჟურნალისტი ლეილა მუსტაფაევა, მათი განმარტებით, ჟურნალისტური საქმიანობისა და კრიტიკული პოზიციების გამო, აზერბაიჯანის ხელისუფლების მხრიდან სისტემურ დევნასა და შევიწროებას განიცდნენ.