აზერბაიჯანელი ჟურნალისტს, აფგან მუხთარლის რომელიც 29 მაისს თბილისში გაუჩინარდა და შემდგომ აზერბაიჯანელი მესაზღვეების ხელში აღმოჩნდა, აზერბაიჯანის პროკურატურამ სამი ბრალი წაუყენა. ინფორმაციას ამის შესახებ ჟურნალისტი, ხადიჯა ისმაილოვა ავრცელებს:

"დაკითხვა დასრულდა. ადვოკატები სასამართლოში მიემართებიან. აფგანიც იქ იქნება. დამატებითი ბრალი - ძალადობრივი წინააღმდეგობის გაწევა სასაზღვრო პოლიციისთვის.

საზღვრის უკანონო კვეთა 318.1, კონტრაბანდა 206.1 და სამართალდამცავებისთვის წინააღმდეგობის გაწევა 315.2 - სამი ბრალი ერთად.“- წერს ისმაილოვა

შეგახსენებთ 29 მაისს საღამოს თბილისში აზერბაიჯანელი აქტივისტი და ჟურნალისტი აფგან მუხთარლი გაუჩინარდა, როგორც მისი ადვოკატის მიერ გავრცელებული ინფორმაციით ირკვევა, თბილისში, საკუთარ სახლთან დააკავეს და ძალით ჩასვეს მანქანაში. ადვოკატის ინფორმაციით, დამკავებლებს თავი არ წარუდგენიათ, თუმცა, მუხთარლის აზრით, ისინი საქართველოს სპეცსამსახურების თანამშრომლები იყვნენ. როგორც აფგან მუხთარლის ადვოკატი აცხადებს, მისი დაცვის ქვეშ მყოფ პირს ტომარა ჩამოაცვეს თავზე და დაახლოებით ორი საათის განმავლობაში მიჰყავდათ მანქანით გაურკვეველი მიმართულებით. მანქანა ორჯერ გამოიცვალეს. მუხთარლის თქმით, მესამე მანქანაში აზერბაიჯანულად ლაპარაკობდნენ. აზერბაიჯანელი ჟურნალისტის სიტყვებით, როცა მას ტომარა მოხსნეს, იგი აზერბაიჯანის სასაზღვრო-გამშვებ პუნქტში იმყოფებოდა. მუხთარლის თქმით, მას 10 ათასი ევრო ჩაუდეს. აზერბაიჯანის ხელისუფლება საზღვრის უკანონოდ გადაკვეთისა და კონტრაბანდის ბრალდებებს უყენებს. აფგან მუხთარლი და მისი მეუღლე, ჟურნალისტი ლეილა მუსტაფაევა, მათი განმარტებით, ჟურნალისტური საქმიანობისა და კრიტიკული პოზიციების გამო, აზერბაიჯანის ხელისუფლების მხრიდან სისტემურ დევნასა და შევიწროებას განიცდნენ.