აფხაზეთის ე.წ. ხელისუფლებამ ოთხოზორიას მკვლელობაში ბრალდებულის მიმართ სისხლის სამართლებრივი დევნა შეწყვიტა

პოლიტიკა - 16:06, 31 May, 2017

13328

გიგა ოთხოზორიას მკვლელობაში ბრალდებული რაშიდ კანჯიოღლი ე.წ. წინაპატიმრობაში აღარ იმყოფება. აღნიშნული ინფორმაცია, გალში გამართულ დღევანდელ შეხვედრაზე აფხაზეთის დე ფაქტო მთავრობის წარმომადგენლებმა საქართველოს სახელმწიფო უსაფრთხოების სამსახურის წარმომადგენლებს მიაწოდეს.
როგორც ირკვევა აფხაზურმა მხარემ ბრალდებულის მიმართ სისხლის სამართლებრივი დევნა შეწყვიტა.
სუს-ის ანალიტიკური დეპარტამენტის ინფორმაციით, ეს საკითხი დღის წესრიგში დადგება, არა მხოლოდ გალის შეხვედრებზე, არამედ უფრო მაღალი დონის შეხვედრებზე.

გარდა ამისა, დღევანდელ შეხვედრაზე, ბოლო პერიოდში ე.წ. საზღვარზე გახშირებულ დაკავებებზეც იმსჯელეს, საუბარი შეეხო ასევე დრანდის ციხეში მყოფი პატიმრის გიორგი ლუკავას საკითხსაც.

გალის რაიონიდან დევნილი 31 წლის გიგა ოთხოზორია 19 მაისს ხურჩა-ნაბაკევის ადმინისტრაციულ საზღვართან, საქართველოს კონტროლირებად ტერიტორიაზე, ვერაგულად მოკლეს.

ახალგაზრდა მამაკაცის მკვლელობის ფაქტზე გამოძიება იმავე დღეს დაიწყო. პროკურატურის ინფორმნაციით, რაშიდ კანჯი-ოღლის ბრალდება 21 მაისს საქართველოს სისხლის სამართლის კოდექსის 108-ე (განზრახ მკვლელობა) და 236-ე მუხლის მეორე და მესამე ნაწილებით (ცეცხლსასროლი იარაღის მართლსაწინააღმდეგო შეძენა, შენახვა და ტარება) დაუსწრებლად წარუდგინა. პროკურატურის შუამდგომლობის საფუძველზე რაშიდ კანჯი-ოღლის აღკვეთის ღონისძიების სახით შეეფარდა პატიმრობა და გამოტანილი იქნა დადგენილება ძებნის თაობაზე.