"საქართველო ნელ-ნელა უსაფრთხო ქვეყნის რეპუტაციას კარგავს" - კორძაია ჟურნალისტის ქვეყნიდან გაყვანას საგანგაშოს უწოდებს

პოლიტიკა - 12:19, 31 May, 2017

1517

“რესპუბლიკური პარტიის” აღმასრულებელი მდივანი საქართველოდან აზერბაიჯანელი ჟურნალისტის იძულებით გაყვანის ფაქტს ეხმაურება და ამბობს, რომ "საქართველო ნელ-ნელა კარგავს უსაფრთხო ქვეყნის რეპუტაციას".

თამარ კორძაიამ დღეს შინაგან საქმეთა სამინისტროს მიმართა, მისი თქმით, ყწყებამ სასწრაფოდ უნდა გასცეს კითხვებს პასუხი თუ როგორ მოხვდა ჟურნალისტის საზღვარზე გადაყვანა და რატომ ვერ დაიცვა ქართულმა სახელმწიფომ მუხთარლი.

“ძალზე საგანგაშო და სამწუხარო ფაქტი მოხდა აზერბაიჯანელ ჟურნალისტთან დაკავშირებით. ყველაზე საგანგაშო ისაა, რომ შინაგან საქმეთა სამინისტრო არ იძლევა პასუხს, თუ როგორ მოხდა ამ ადამიანის საქართველოდან აზერბაიჯანში გადაყვანა. ფაქტობრივად, ჟურნალისტი მოიტაცეს ჩვენი ქვეყნიდან, რომელიც საკუთარი მოვალეობის შესრულების გამოა აზერბაიჯანის ციხეში. არ გვაქვს არანაირი პასუხები, რატომ ვერ დაიცვა ჩვენმა სახელმწიფომ ეს ადამიანი. არ გვაქვს პასუხი, როგორ მოხდა საზღვრის კვეთა”, - განაცხადა თამარ კორძაიამ.

გუშინ, 30 მაისს ოჯახმა გაავრცელა ინფორმაცია, რომ აზერბაიჯანელი ჟურნალისტი თბილისიდან გაუჩინარდა. მოგვიანებით, ცნობილი გახდა, რომ ის ბაქოში გადაიყვანეს. ადვოკატის თქმით, აფგან მუხთარლი სასტიკად ნაცემია.