პატრიარქის დამხობა - ედიშერ ქარჩავა მიტროპოლიტებს და თეოლოგებს ბრალდებებს უყენებს

პოლიტიკა - 17:13, 29 May, 2017

6708

საპატრიარქოს იურისტის ედიშერ ქარჩავას თქმით სასულიერო აკადემიაში „მოკალათებულია“ ჯგუფი, რომელიც არ ცნობს საქართველოს პატრიარქს და არ აღიარებს მას როგორც სულიერ მამას. ქარჩავას განცხადებით ეს ჯგუფი ახდენს წარმატებული სტუდენტების გადაბირებას და განაწყობს ეკლესიის წინააღმდეგ. მისი განცხადებით აღნიშნული ჯგუფი ცდილობს საქართველოს ეკლესია კონსტანტინოპოლის ეკლესიას დაუქვემდებაროს. ქარჩავამ ამ ჯგუფის წევრად დაასახელა თეოლოგიის დოქტორი გოჩა ბარნოვი, თეოლოგი თემურ ბუაძე.

ქარჩავას ბრალდებას გოჩა ბარნოვმა უპასუხა. მისი თქმით საპატრიარქოს იურისტის ეს განცხადებები პირადი წყენით არის მოტივირებული:

„მე საპატრიარქოს იურისტის ამ განცხადებას ვუწოდებ არასერიოზულს. როდესაც ედიშერ ქარჩავა ჩემზე და თემურ ბუაძეზე საუბრობს, თითქოს ჩვენ ვაგზავნით სტუდენტებს საზღვარგარეთ იმის გამო, რომ შემდგომ დავამხოთ პატრიარქი, ეს არის აბსოლუტური იდიოტობა და სისულელე, იმიტომ რომ 5 სტუდენტი რომელიც ათენის უნივერსიტეტში სწავლობს, წასულია პატრიარქის რეკომენდაციით. ეს არის ჩვეულებრივი საერთაშორისო პროგრამა. რაიმე მცდელობა ჩვენი მხრიდან, რომ თითქოს ვაპირებდეთ პატრიარქის დისკრედიტაციას და მის დამხობას არის აბსოლუტური სისულელე. მოტივაცია არის პირადი წყენა, როდესაც ბატონმა ვლადი ნარსიამ ედიშერ ქარჩავას წამოაძახა სამაგისტრო ნაშრომთან დაკავშირებით, რომ მას სურდა გადაწერით გაეკეთებინა ეს ნაშრომი, ამ ნაშრომის ხელმძღვანელი ვიყავი მე, ეს შევამჩნიე და მას ვუთხარი რომ ასე არ შეიძლებოდა და უარი ვთქვი თანამშრომლობაზე. ის მე დამემუქრა, რომ მას კავშირები ქონდა საპატრიარქოში, საბოლოოდ მან მაინც მოახერხა ხარისხის მიღება, შეცვალა თემა.“- განაცხადა ბარნოვმა.

ბარნოვის თქმით მას პირადი ურთიერთობაც კი არ აქვს იმ ადამიანებთან, რომელთან ერთადაც ჯგუფში ყოფნაში ბრალს სდებს ედიშერ ქარჩავა:

„ჩვენი კავშირები მეუფე პეტრესთან, მეუფე ანდრია გვაზავასთან და სოსო ოხანაშვილთან თითქოს პატრიარქის ლიკვიდაციის მიზნით აბსურდია აბსოლუტურად. მე პირადი ურთიერთობები მეუფე ანდრიასთან არ მქონია, არც მეუფე პეტრესთან თუ არ ჩავთვლით სტუდენტურ წლებს 1996-98-ში.“- განაცხადა ბარნოვმა.

ქარჩავას ბრალდებას კატეგორიულად უარყოფს თეოლოგი თემურ ბუაძე და მის განცხადებებს აბსოლუტურად აბსურდულს უწოდებს.