29 მაისს, NATO-ს საპარლამენტო ასამბლეის საგაზაფხულო სესიის ბოლო დღეს დელეგატები საქართველოს მხარდამჭერ კომუნიკეს მიიღებენ, რითიც NATO-ს დელეგაციის წარმომადგენლები საქართველოს ევროპულ და ევროატლანტიკურ სტრუქტურებში ინტეგრაციასა და ტერიტორიულ მთლიანობას კიდევ ერთხელ დაუჭერენ მხარს.

„ეს დოკუმენტი არის საქართველოს ევროპულ და ევროატლანტიკურ სტრუქტურებში ინტეგრაციის მხარდამჭერი. დელეგატების უმრავლესობა, როგორც ვიცით, მხარს უჭერს საქართველოს ევროკავშირსა და ნატო-ში გაწევრიანებას. დოკუმენტი ასევე ასახავს ტერიტორიული მთლიანობის მხარდაჭერასა და ჩვენს პოზიციას უკანონო ოკუპაციასთან დაკავშირებით,“ - განაცხადა ლატვიის სეიმის საგარეო ურთიერთობათა კომისიის თავმჯდომარემ ოიარს ერიკს კალნინსმა.

იგი საქართველოს NATO-ში გაწევრიანების საკითხსაც შეეხო.

„გადაწყვეტილება 28 ქვეყანამ უნდა მიიღოს. შესაძლებელია თუ არა NATO-ში გაწევრიანება MAP-ის გარეშე? ვფიქრობ რომ კი. კითხვა იმაში მდგომარეობს თუ როდის. ჩემი პირადი აზრია, რომ საქართველო წევრობას იმსახურებს. მაგრამ საერთაშორისო სიტუაციის გათვალისწინებით, ამას დრო დასჭირდება,“ - განაცხადა კალნინსმა.