„მთავარია, რუსეთის არ გვეშინოდეს. პუტინსა და კრემლს სურთ შიში გაგვიჩინონ“

„მთავარია, რუსეთის არ გვეშინოდეს. პუტინსა და კრემლს სურთ შიში გაგვიჩინონ“ - ნატო-ს ლიტვის დელეგაციის ხელმძღვანელი

პოლიტიკა - 14:56, 28 May, 2017

2127

ნატო-ს საპარლამენტო ასამბლეის ვიცე-პრეზიდენტმა, ნატო-ს საპარლამენტო ასამბლეაში ლიტვის დელეგაციის ხელმძღვანელმა, რასა იუკნევიჩიენემ ნატო-ს საპარლამენტო ასამბლეაზე განაცხადა,რომ რუსეთი საფრთხეს არამარტო მის მოსაზღვრე ქვეყნების, არამედ დასავლური ცივილიზაციის ქვეყნებისათვის წარმოადგენს.

„ჩვენ სტრატეგია უნდა შევიმუშაოთ. ყირიმის ანექსიის შემდეგ ნატო-ს ქვეყნებმა გაიღვიძეს. რამდენიმე წლის წინ ჩვენ, ლიტველებს, ლატვიელებს, ქართველებს, უკრაინელებს, არავინ გვისმენდა, როდესაც ვამბობდით, რომ პუტინს დასავლურ დემოკრატიებზე იერიშის მიტანა სურს. დღეს მნიშვნელოვანია, რომ ჩვენ ამაზე ვისაუბროთ. ჩვენ უნდა დავეხმაროთ საქართველოსა და უკრაინას სულ უფრო და უფრო დაუახლოვდნენ ევროკავშირსა და ნატოს“, - დასძინა რასა იუკნევიჩიენემ.

მისივე თქმით, რუსეთი საამისოდ საინფორმაციო ომს, ე.წ. „ფეიქ ნიუსებს“ და კიბერშეტევებს იყენებს. „მთავარია ჩვენ რუსეთის არ გვეშინოდეს. ეს ძალიან მნიშვნელოვანია. პუტინსა და კრემლს სურთ შიში გაგვიჩინონ“, - აღნიშნა ნატო-ს საპარლამენტო ასამბლეაზე ლიტვის დელეგაციის ხელმძღვანელმა.