ნატო-ს საპარლამენტო ასამბლეის თავმჯდომარე პაოლო ალი, დელეგატებთან ერთად, ოკუპირებული ახალგორის მოსაზღვრე სოფელ ოძისს ესტუმრა. ალიანსის წარმომადგენლებს ქართულმა მხარემ მავთულხლართებით გაყოფილი სოფლების ოძისისა და ახმაჯის მაცხოვრებელთა პრობლემები ადგილზე გააცნო. სტუმრებთან ერთად სახელმწიფო უსაფრთხოების სამსახურის ანალიტიკური დეპარტამენტის წარმომადგენლები იმყოფებოდნენ. ალიანსის წარმომადგენლებმა სრული ინფორმაცია მიიღეს მცოცავი ოკუპაციის, მოქალაქეების უკანონოდ დაკავებისა და თავისუფალი გადაადგილების შეზღუდვის შესახებ.

საქართველოს ოკუპირებულ რეგიონში ნატო-ს საპარლამენტო ასამბლეის დელეგაცია გუშინაც იმყოფებოდა. დელეგაციის წევრებს შეეძლოთ იმ რუსული სამხედრო ბაზის დანახვა, რომელიც თბილისიდან 40 კილომეტრში მდებარეობს. ნატოს საპარლამენტო ასამბლეის მონაწილეებმა საოკუპაციო ხაზთან არსებულ ვითარებას ძალზედ სამწუხარო უწოდეს და აღნიშნეს, რომ ყველაფერი უნდა გაკეთდეს პრობლემის მშვიდობიანად მოგვარებისთვის.