"მშვიდობიანი და თანამიმდევრული პოლიტიკაა ის იარაღი , რომელიც გააერთიანებს ჩვენს სამშობლოს და დაგვიბრუნებს აფხაზ და ოს ძმებს"- პრემიერი

პოლიტიკა - 13:03, 26 May, 2017

1601

პრემიერ-მინისტრმა საქართველოს დამოუკიდებლობის დღისადმი მიძღვნილ ოფიციალურ ცერემონიაში მიიღო მონაწილეობა. გიორგი კვირიკაშვილმა თავისუფლების მოედანზე შეკრებილ ოფიციალურ პირებს და მოქალაქეებს სიტყვით მიმართა:

„გილოცავთ საქართველოს დამოუკიდებლობის დღეს 26 მაისს. ჩვენ ვზეიმობთ ქართული სახელმწიფოსათვის უმთავრეს, ყოველი ჩვენგანისთვის ძვირფას დღეს. ვულოცავ მთელ საქართველოს, თითოეულ მოქალაქეს. დამოუკიდებლობის დღეს გილოცავთ თქვენ, ჩვენი ქვეყნის ჯარისკაცებო. დღევანდელი დღე განსაკუთრებული და გამორჩეულად ამაღლებულია, ჩვენი წვევამდელებისთვის, რომლებმაც ასეთ საზეიმო დღეს დადეს საქართველოს ერთგულების ფიცი და ჩადგნენ ქვეყნის სამსახურში . არ არსებობს იმაზე მეტი პატივი ვიდრე სამშობლოს სადარაჯოზე დგომა. გილოცავთ ყველას ფიცის დადებას და ჯარისკაცის საპატიო მისიის დაწყებას. მე მჯერა, რომ თქვენ პირნათლად ემსახურებით საქართველოს და ღირსეულად ატარებთ ქართველი მეომრის სახელს. ჩვენო ჯარისკაცებო, მე ვისურვებდი რომ ვაჟკაცობა, ერთგულება, მეგობრობა, ერთმანეთის გატანა და მოყვასის სიყვარული მუდამ თქვენი მეგზური ყოფილიყოს. ყოველთვის გახსოვდეთ და იამაყეთ, რომ რუსთაველის ქვეყნიდან ხართ. უერთგულეთ იმ ღირებულებებს, რომლებიც საუკუნეებს გამოატარა ჩვენმა წინაპარმა და ჩვენი ერის ზნეობრივ კოდექსად იქცა. დამოუკიდებლობის დღე მინდა განსაკუთრებულად მივულოცო საერთაშორისო სამშვიდობო მისიების მონაწილე ჩვენს საამაყო სამხედროებს, რომლებიც საქართველოს სახელმწიფოებრიობას და ჩვენი შვილების მომავალს იცავენ. იცავენ მშვიდობას მსოფლიოში, მინდა მადლობა გადავუხადო მათ იმისათვის, რომ განსაკუთრებული პროფესიონალიზმისა და სიმამაცისათვის, საერთაშორისო აღიარება დაიმსახურეს. წელს საქართველოს დამოუკიდებლობის დღე გამორჩეულია იმით, რომ ამ დღეს ჩვენ ვუძღვნით შოთა რუსთაველს და მის უკვდავ ვეფხისტყაოსანს. ჩვენ მსოფლიოს უდიდესი საგანძურის პატრონი ერი ვართ და როგორც რუსთაველის შთამომავლები, ვალდებული ვართ ვუერთგულოთ და ვიცხოვროთ იმ ღირებულებებით, რომლებიც 850 წელს ითვლის. ალბათ ამიტომაცაა, რომ ქართველი კაცის გაუტეხელობამ, ღირსებამ, სიმამაცემ, თავგანწირვამ და რაინდობამ სამშობლო შეგვინარჩუნა. დღეს საქართველო დამოუკიდებელი და თავისუფალი ქვეყანაა და არაფრის ფასად არ დათმობს ამ უდიდეს მონაპოვარს. დღევანდელ დღეს მინდა ქედი მოვიხარო სამშობლოსთვის თავდადებული გმირების უკვდავი სულების წინაშე და პატივი მივაგო საქართველოს თავისუფლების, დამოუკიდებლობისა და ერთიანობისთვის ბრძოლაში დაღუპულთა ხსოვნას. დღეს ქვეყანას ჩვენგან თავდადება ისევ სჭირდება, რათა შევინარჩუნოთ, კიდევ უფრო განვამტკიცოთ და გავაძლიეროთ ჩვენი მრავალეროვანი ქართული სახელმწიფო. დღეს მშვიდობიანი და თანამიმდევრული პოლიტიკაა ის იარაღი , რომელიც გააერთიანებს ჩვენს სამშობლოს და დაგვიბრუნებს აფხაზ და ოს ძმებს . დღეს საქართველო არის ქვეყანა, რომლის მოქალაქეებსაც ევროპამ ფართოდ გაუღო კარი და მე მჯერა, სულ მალე დადგება დრო, როდესაც თანამედროვე და დემოკრატიული საქართველოს სახელმწიფო ღირსეულ ადგილს დაიმკვიდრებს დიდ ევროპულ ოჯახში. მე მჯერა, რომ ჩვენს ქვეყანას ნათელი მომავალი აქვს, თქვენ რომ გიყურებთ ეს რწმენა კიდევ უფრო მემატება. ჩვენ ვაშენებთ თავისუფალ, დემოკრატიულ და ძლიერ ქვეყანას და ჩვენ აუცილებლად ვიამაყებთ ჩვენი ერთიანი სამშობლოთი. კიდევ ერთხელ გილოცავთ დღევანდელ დღეს, ღმერთი იყოს თქვენი და მთელის საქართველოს მფარველი.“- განაცხადა გიორგი კვირიკაშვილმა.