"საქართველო ნატო-ს წევრი გახდება... რუსეთი ძალიან ფრთხილი უნდა იყოს, როდესაც ზრდის დაძაბულობას"- პაოლო ალი

პოლიტიკა - 12:24, 26 May, 2017

4279

ნატო-ს საპარლამენტო ასამბლეის პრეზიდენტმა, პაოლო ალიმ საქართველოს პარლამენტში სიტყვით გამოსვლისას განაცხადა, რომ რუსეთის ფედერაცია ძალიან ფრთხილი უნდა იყოს, როდესაც რეგიონში დაძაბულობას ზრდის.

”ჩვენ ვფიქრობთ, რომ საქართველო ნატო-ს წევრი გახდება. ეს ბევრჯერ ითქვა ბუქარესტში 2008 წელს და ის ძალაში რჩება. რაც შეეხება რეგიონში სიტუაციას, ჩვენ გვქონდა საუბარი პარლამენტის თავმჯდომარესთან და გვესმის რუსეთის აგრესიული ქცევა. ჩვენ მხარს ვუჭერთ საქართველოს ტერიტორიულ მთლიანობას, ისევე როგორც უკრაინისას. ორივე ქვეყანაში ძალიან მსგავსი სიტუაციაა, შეიძლება სამხედრო თვალსაზრისით არა, მაგრამ სხვა მხრივ. არასტაბილურობა რეგიონში - ეს არის საფრთხე, ეს მუქარაა საერთოდ დასავლეთისთვის, ქვეყნებისთვის. ჩვენ ვგრძნობთ პასუხისმგებლობას, ვალდებულებას და ჩვენ ამ მხარდაჭერას კიდევ ერთხელ ხაზს ვუსვამთ. რუსეთის ფედერაცია ძალიან ფრთხილი უნდა იყოს, როდესაც ზრდის ამ დაძაბულობას. დაძაბულობის გაზრდა არ არის კარგი საერთაშორისო გარემოსთვის. ჩვენ გვაქვს საერთო ინტერესი, ამ შემთხვევაში ტერორიზმთან ბრძოლაში და იმედია, რუსეთის ფედერაციას ესმის, რომ არ უნდა ჰქონდეს ასეთი აგრესიული ქცევა. ჩვენ, რა თქმა უნდა, რუსეთის პოზიციას წინააღმდეგობას ვუწევთ"- განაცხადა პაოლო ალიმ.

ქართველი ჟურნალისტები დაინტერესდნენ, შესაძლებელია თუ არა, რომ საქართველო ნატო-ს წევრი MAP-ის გარეშე გახდეს რაზეც ატო-ს საპარლამენტო ასამბლეის პრეზიდენტმა თქვა რომ MAP-ი არის კონკრეტული საშუალება, რათა პროცესი დაიწყოს.

"MAP-ი გახლავთ ინსტრუმენტი, მნიშვნელოვანი პოლიტიკური ხედვა და MAP-ი არის კონკრეტული საშუალება, რათა პროცესი დაიწყოს. ჩვენ ამაზე საუბარს გავაგრძელებთ”, - განაცხადა ნატო-ს საპარლამენტო ასამბლეის პრეზიდენტმა.