ზუგდიდის მერიის საბჭო წევრთა ნაწილმა პროტესტის ნიშნად დატოვა

პოლიტიკა - 10:48, 25 May, 2017

1308

ქალაქ ზუგდიდის მერის მრჩეველთა საბჭო წევრთა ნაწილი განცხადებით ეხმიანება ქალაქ ზუგდიდის საკრებულოს მიერ 2017 წლის 22 მაისს მიღებულ გადაწყვეტილებას, მუნიციპალიტეტების გაერთიანების მხარდაჭერის თაობაზე. კახა ჯიქიას, ირაკლი ყალიჩავას, არჩილ თოდუას, გიორგი შელიას, ეკა მინჯორაიას და ინგა შონიას ერთობლივი განცხადებით, პროტესტის ნიშნად ტოვებენ საბჭოს შემადგენლობას.

საბჭოს წევრების განცხადებით ისინი თავიდანვე კატეგორიულად ეწინააღმდეგებოდნენ თვითმმართველი ქალაქ ზუგდიდის გაუქმების იდეას. როგორც საბჭოს წევრებს, ასევე ქალაქ ზუგდიდის მცხოვრებთა უმრავლესობა მიიჩნევენ, რომ ხელისუფლების მიერ გაცხადებული სურვილის განხორციელება ცალსახად დააზარალებს ქვეყნის დემოკრატიზაციის და ხელისუფლების დეცენტრალიზაციის პროცესს.

„სამწუხაროა, რომ ჩვენს მიერ 2017 წლის 19 მაისს გავრცელებული მოწოდების მიუხედავად, არც ქალაქ ზუგდიდის მერს, არც ქალაქ ზუგდიდის მაჟორიტარ დეპუტატს საქართველოს პარლამენტში არ გამოუხატავთ მკვეთრი და მკაფიო პოზიცია თვითმმართველი ქალაქების გაუქმების წინააღმდეგ. უკიდურესად სამწუხაროა, რომ ქალაქ ზუგდიდის საკრებულომ ვერ შეძლო წინააღმდეგობა გაეწია ხელისუფლებისაგან მიღებული დირექტივისათვის და არ გაითვალისწინა ადგილობრივი მოსახლეობის უმრავლესობის შეხედულებები.

ამ პირობებში ჩვენ მიუღებლად მიგვაჩნია ვიყოთ ქალაქ ზუგდიდის მერის მრჩეველთა საბჭოს წევრები და პროტესტის ნიშნად ვტოვებთ მას.