სუვენირებით მოვაჭრეები აჭარის მთავრობის შენობასთან საპროტესტო აქციას მართავენ

პოლიტიკა - 14:06, 23 May, 2017

1090

აჭარის მთავრობის სახლთან, მოვაჭრეები რომელთა სავაჭრო ჯიხურები ბულვარის მიმდებარე ტერიტორიიდან გუშინ ბათუმის მერიამ აიღო აქციას მართავენ. აქციის მონაწილეები აცხადებენ, რომ სამოცამდე მოვაჭრეს მერია მხოლოდ 25 ჯიხურს და მორიგეობით ვაჭრობას სთავაზობს, ისინი ისინი ბათუმის მერიისგან , ახალი დიზაინის ჯიხურების რაოდენობის 25-დან 50-მდე გაზრდას ითხოვენ. გარე მოვაჭრეების განცხადებით, მათი რაოდენობა აღემატება იმ რიცხვს, რამდენ ჯიხურსაც სთავაზობს მთავრობა.

დღეს აჭარის მთავრობის წევრებთან და ქალაქის მერთან შეხვედრაც გაიმართა, თუმცა სუვენირებით მოვაჭრეები ამბობენ, რომ მათი მოთხოვნის სანაცვლოდ მთავრობამ 25 ჯიხურში გადანაწილება შესთავაზა. ამ შეხვედრის შემდეგ აქციის მონაწილეები პერმანენტულად საპროტესტო გამოსვლებს აანონსებენ.

დღეს მთავრობის წარმომადგენლებს და ქალაქის მერს განცხადება არ გაუკეთებიათ, გუშინ კი, გიორგი ერმაკოვი აცხადებდა, რომ ჯიხურების რაოდენობა საკმარისია. ძველი ჯიხურები ქალაქის იერსახეს ამახინჯებდა და ვაჭრობაც უკანონოდ მიმდინარეობდა. სწორედ ამიტომ მიიღო მერიამ ჯიხურების აღების გადაწყვეტილება. მერის განცხადებით, გარემოვაჭრეების ნაწილს კონკრეტული ბიზნესმენები მართავენ, რომლებიც კანონის გვერდის ავლით მოქმედებენ, გადასახადებს არ იხდიან და მოვაჭრეების ნაწილს ხელფასზე ამუშავებენ.