მიწის გასხვისების შესახებ ჩანაწერი კონსტიტუციაში - საზოგადოების დაკვეთა თუ რუსული ზეგავლენა

პოლიტიკა - 13:19, 23 May, 2017

2146

მიწის გასხვისებასთან დაკავშირებით კონსტიტუციაში დამატებითი ჩანაწერი გაკეთდება, რომლის მიხედვითაც საქართველოს მოქალაქეობის არმქონე პირები ქვეყნის ტერიტორიაზე სასოფლო-სამეურნეო მიწებს ვერ იყიდიან. გადაწყვეტილება პარლამენტის იურიდიულ საკითხთა კომიტეტის სხდომაზე მიიღეს, თუმცა ამ ეტაპზე უცნობია, საკანონმდებლო შეზღუდვის კონკრეტული ფორმულირება.

მიწის გასხვისების შეზღუდვასთან დაკავშირებით კონსტიტუციაში შესატან ცვლილებებს აკრიტიკებს ოპოზიცია, მათი თქმით, მიწის შესახებ კანონს ორგანული კანონი უნდა არეგულირებდეს და არა კონსტიტუცია.

ენმ-ს წევრის რომან გოცირიძის თქმით, მიწის გაყიდვის აკრძალვის კონსტიტუციაში შეტანა, რუსული პოლიტიკის გამეორებაა.

"კონსტიტუციაში არ იწერება ყველა დეტალი, თუ არის გარკვეული დებულებები ამისთვის საჭიროა ამისთვის არის ორგანული კანონი. კონსტიტუციის დონეზე რაღაც საკითხების აყვანა, მიწის საკითხი იქნება თუ ქორწინების, ეს არის პირდაპირ რუსული ზეგავლენის გამოხატულება, რომელიც განაწყობს ქვეყანას ანტიევროპულად და ანტიდასავლურად. თითქოსდა ვიღაც, მიწას, ქართველობას, ან კიდევ რაღაცას გვართმევს. ეს არის შემოგდებული თემები.“- განაცხადა რომან გოცირიძემ.

რუსულ პროპაგანდას უკავშირებენ საპარლამენტო უმრავლესობის ინიციატივას ევროპული საქართველოს წევრებიც.

„ეს არის წმინდა რუსული საბჭოთა პროპაგანდა, რომელიც ებრძვი კერძო საკუთრებას და რომელიც მოუტანს ამ ქვეყანას იმას, რომ მაგალითად ბიძინა ივანიშვილი შეისყიდის მიწებს გაცილებით იაფად და სამაგიეროდ ქვეყანა გაღარიბდება. წართმეული მიწები არის რუსეთის მიერ ოკუპირებული. ეს არის რუსული პროპაგანდა და ამას იყენებს არაერთი პარტია.“ - განაცხადა სერგო რატიანმა.

განსხვავებული მოსაზრება აქვს მმართველ გუნდს, უმრავლესობა თვლის რომ კონსტიტუციაში მიწის გასხვისებასთან დაკავშირებით ჩანაწერის გაკეთება ხალხის დაკვეთაა და მათი თქმით ისინი საზოგადოების მოთხოვნას ითვალისწინებენ.

„ჩვენ გვინდა, რომ მაქსიმალურად მოქნილი ვიყოთ. როგორ მოხდება ამ საკითხის კონსტიტუციაში ასახვა, ამაზე მსჯელობა გაგრძელდება. ფაქტია, რომ ჩვენს მოსახლეობას ეს თემა აწუხებს და ჩვენ, დეპუტატები ვალდებული ვართ, რომ საზოგადოების ეს მოთხოვნა გავითვალისწინოთ,“ - განაცხადა ირაკლი სესიაშვილმა.