ზუგდიდი ქალაქის სტატუსის გარეშე - ოპოზიცია საკრებულოს ოქმს სასამართლოში ასაჩივრებს

პოლიტიკა - 12:24, 23 May, 2017

1168

„ერთიანი ნაციონალური მოძრაობა“ ზუგდიდისთვის თვითმმართველი ქალაქის სტატუსის ჩამორთმევას სასამართლოში გაასაჩივრებენ.

როგორც ენმ-ს ზუგდიდის საკრებულოს წევრმა ანი წითლიძემ “ნიუპოსტს“ განუცხადა საკრებულომ შესაბამისი ოქმი მთელი რიგი დარღვევებით, უკანონოდ შედგა.

დეპუტატის თქმით, რეალურად არ დათვლილა ვინ იყო მომხრე და ვინ წინააღმდეგი ზუგდიდისთვის თვითმმარველი ქალაქის სტატუსის ჩამორთმევის.

ოპოზიციური პარტიის ერთ-ერთი ლიდერი აცხადებს, რომ საკრებულო გუშინ შემდგარ ოქმს, ოპოზიციას არ აძლევს, რომ მათ სასამართლოს მიმართონ.

„ჩვენ ოქმის გასაჩივრებას ვაპირებთ, რადგან მთელი რიგი პროცედურული დარღვევებია ოქმთან დაკავშირებით. ჯერ ერთი, ოქმში არ ასახულა - ვინ იყო მომხრე და ვინ წინააღმდეგი, დოკუმენტში არც ის ასახულა კენჭისყრაზე რა საკითხი დადგა, ეს საკებულოს თავმჯდომარეს არ უთქვამს. სხდომის დარბაზიდან ქალბატონი თავმჯდომარის 2 ჯერ გაქცევისა და დაბრუნების შემდეგ არც არავის დაუთვლია მომხრეები, ქვორუმი საერთოდ არ დათვლილა სხდომაზე. გარდა ამისა, სხდომა ისე დამთავრდა, რომ ოქმში არც კი ჩაწერილა რა გადაწყვეტილება იქნა მიღებული, ვინ იყო მომხრე, ვინ წინააღმდეგი და თავი ვინ შეიკავა. ჩვენ ოქმი გუშინვე გამოვითხოვეთ, თუმცა ამ დრომდე ვერ მივიღეთ, რომ სამართლებრივად გავასაჩივროთ“- აღნიშნა წითლიძემ.

დეპუტატი თქმით, სარჩელს ის ვიდეომტკიცებულებაც დაერთვება. სადაც საკრებულოს თავმჯდომარის მოადგილე ღიად ამბობს, რომ მათ იცოდნენ თუ ვინ დაუჭერდა ღიად ინიციატივას მხარს.

მისი თქმით, პარტია იმ არასამთავრობოებთან ითანამშრომლებს, რომელიც გადაწყვეტილების გასაჩივრებას გეგმავს, თუმცა ენმ სარჩელს დამოუკიდებლად შეიტანს.

სიტყვიერი დაპირისპირების, ოპოზიციის, არასამთავრობო ორგანიზაციის წარმომადგენელთა და მოქალაქეების პროტესტის მიუხედავად, ზუგდიდს თვითმმართველი ქალაქის სტატუსი გუშინ ჩამოართვეს.

ოპოზიცია საკრებულოს თავმჯდომარის შანტაჟზე ღიად საუბრობს. როგორც საკრებულოს ოპოზიციური ფრთა ნიუპოსტთან აცხადებს, შეროზიამ ხელსუფლებისა და სუსის ზეწოლას ვერ გაუძლო.