თბილისის მერობაზე კახა კალაძის კანდიდატურის განხილვას მმართველი გუნდი არ უარყოფს

პოლიტიკა - 11:58, 23 May, 2017

3346

მმართველ გუნდში არ უარყოფენ, რომ თბილისის მერობის კანდიდატად ვიცეპრემიერ/ენერგეტიკის მინისტრის კახა კალაძის კანდიდატურა განიხილება. უმრავლესობის წევრების თქმით, გუნდში მერობის კანდიდატურებზე მსჯელობა მიდის, თუმცა საბოლოო გადაწყვეტილებას პოლიტსაბჭო მიიღებს.

ლევან გოგიჩაიშვილის თქმით, დედაქალაქის მოქმედი მერის კანდიდატურის განხილვა უმრავლესობაში არ მომხდარა:

„დავით ნარმანიას საკითხის და მისი კანდიდატურის განხილვა ოფიციალურად უმრავლესობაში არ ყოფილა. რაც შეეხება ჩვენს კანდიდატს ქალაქ თბილისში ამასთან დაკავშირებით პოლიტსაბჭო მიიღებს გადაწყვეტილებას, ამას გარკვეული პერიოდი კიდევ დასჭირდება.“- განაცხადა ლევან გოგიჩაიშვილმა.

ზვიად ძიძიგურის თქმით კანდიდატურებს შორის შეიძლება იყოს კახი კალაძეც და დავით ნარმანიაც:

„კონსულტაციები ასეთ ტიპის მე არ ვიცი. ერთი რაც შემიძლია გითხრათ პირდაპირ, რომ კონსულტაციებიც და კანდიდატურებზე მსჯელობაც იქნება და ამ კანდიდატურების ჩამონათვალში შეიძლება ბატონი კახი კალაძეც ვიხილოთ და ბატონი დავით ნარმანიაც. შეიძლება სხვა გვარებიც ვიხილოთ,“ - განაცხადა ზვიად ძიძიგურმა.