საკონსტიტუციო ცვლილებების უარყოფითი გავლენა ქვეყნის უსაფრთხოებაზე - უშიშროების საბჭოს მდივანმა უსაფრთხოების ექსპერტებთან შეხვედრა გამართა.

პოლიტიკა - 23:05, 22 May, 2017

1427

უშიშროების საბჭოს მდივანმა დღეს უსაფრთხოების ექსპერტებთან შეხვედრა გამართა. შეხვედრის მთავარი თემა საკონსტიტუციო ცვლილებები და ქვეყნის უსაფრთხოებაზე მისი შესაძლო გავლენა იყო. უსაფრთხოების სპეციალისტების მოსაზრებით ქართული ოცნების მიერ დაგეგმილი საკონსტიტუციო ცვლილებები ქვეყნის უსაფრთხოებას დააზიანებს. პრობლემის წარმომქმნელ მთავარ მიზეზებად სპეციალისტები უშიშროების საბჭოს გაუქმებას, მთავარსარდლის ფუნქციების შეზღუდვას და სხვა ინიციატივებს ასახელებენ. მათი შეფასებით, შეთავაზებული ცვლილებები არ შეესაბამება ჩრდილო ატლანტიკურ ალიანსში ინტეგრაციის გაცხადებულ პოლიტიკას.

„უსაფრთხოების თემი მიიჩნევს, რომ ეს ცვლილებები ამ სახით თუ განხორციელდება, საკმაოდ დამაზიანებელი იქნება ეროვნული უსაფრთხოების სისტემისთვის,“ - განაცხადა ეროვნული უშიშროების საბჭოს მდივანმა დავით რაქვიაშვილმა.

თავდაცვის ყოფილი მინისტრი თინათინ ხიდაშელი აქცენტს კონსტიტუციის იმ ჩანაწერზე აკეთებს, სადაც ძირითად შეიარაღებულ ძალებთან ერთად მოხსენიებულია სხვა შეიარაღებული ძალებიც:
„გაუგებარი წარმოშობის, გაუგებარი ლეგიტიმაციის და ფუნქცია-უფლებამოსილების მქონე სხვა შეიარაღებული ძალების შექმნა კონსტიტუციით, ეს არ არის დებულება, რომელიც ნატო-სკენ მიმავალ ქვეყანაში უნდა არსებობდეს,“ - განაცხადა თინათინ ხიდაშელმა.

საქართველოს ატლანტიკური საბჭოს ვიცე-პრეზიდენტის ბათუ ქუთელიას შეფასებით საქართველოს უსაფრთხოების სისტემა მჭიდროდ არის დაკავშირებული ევროატლანტიკურ პარტნიორებთან, ამიტომ უსაფრთხოების ძირითადი პარამეტრების შექმნის პროცესში საქართველოს პარტნიორებიც უნდა იყვნენ ჩართულნი:

„ძირითადი პარამეტრების შექმნის პროცესში, რომელმაც უნდა უზრუნველყოს არა მარტო ჩვენი ქვეყნის უსაფრთხოება, არამედ რეგიონალურ უსაფრთხოებაშიც პოზიტიური წვლილი უნდა შეიტანოს, უნდა ჩაერთონ ჩვენი პარტნიორებიც,“ - განაცხადა ქუთელიამ.

ამავე თემაზე უშიშროების საბჭოში შემდეგი შეხვედრა საერთაშორისო ექსპერტებთან გაიმართება.