სოფელ ციხისჯვარში ქარბორბალამ ასწლოვანი ხეები მოგლიჯა- სტიქიას ერთი ძროხა ემსხვერპლა

შემთხვევა - 22:49, 22 May, 2017

4955

ძლიერი ქარმა ციხისჯვარში 100–მდე ასწლოვანი ხე ძირფესვიანად მოგლიჯა, ნაწილი კი შუაზე გადატყდა. როგორც ადგილობრივები ყვებიან ციხისჯვარში მსგავსი მასშტაბის სტიქია არასდროს ყოფილა.

„სოფლიდან დაახლოებით 120 მეტრში ჩაბნელდა, თან გუგუნი ახლდა. ადგილობრივებმა დაინახეს ძლიერმა ქარმა ხეები, როგორ მოგლიჯა, რამდენიმე მეტრის სიმაღლეზე ჰაერში აიტაცა და ატრიალა. სოფელში მხოლოდ უმნიშვნელო ქარი იყო, თუმცა ტყეში ერთ ძროხას ხე დაეცა და მოკლა. ქარბორბალის შედეგად დაახლოებით 80–100 მეტრი სიგანის განადგურებული კვალი დარჩა“, – განაცხადა ბორჯომის მუნიციპალიტეტის საკრებულოს დეპუტატმა თედორე ილიევმა.

ბორჯომის მუნიციპალიტეტის გამგეობაში აცხადებენ,რომ მსგავსი მასშტაბით ქარბორბალა სოფელში რომ მომხდარიყო, ზარალი უფრო მასშტაბური იქნებოდა.

„ეს რომ დასახლებულ პუნქტში მომხდარიყო, შეიძლება სახლები დანგრეულიყი. ეს სატყეოს ტერიტორიაა. დაახლოებით 250–300 კუბამატრზეა საუბარი, ამას სატყეო სამსახური მიხედავს. ისინი დაითვლიან დაზიანებულ ხეებს და ზარალის რაოდენობას“, – განაცხადა ბორჯომის მუნიციპალიტეტის გამგებლის მოადგილემ ანზორ სვანიძემ.

შემთხვევა სოფელ ციხისჯვარში გუშინ, 21 მაისს საღამოს მოხდა.